ماخاب من كصد ام البنين (ع)

يلّي ابحاجتك حيران * يا من مبتلي بيها
الباب امّ البنين اگصد * ما خاب الگصد ليها
----------
هاي امّ الوفه والجود * هاي الما ترد طلّاب
هاي الألله جاعلها * وخصها للحوايج باب
هاي ام البنين اكرِم * من تربات داحي الباب
إنخاها ابدموع العين * وحلّفها ابإبنها حسين * وحگّ الخالق الكونين
إندبها ابأشد حاجه * ابرمشة عين تگظيها
----------
ابرمشة عين تگظيها * خَصها ابهالأمر ربها
وجينه الليله نتقرب * لعند الباريِ ابحبها
نتوجّه الباب الله * ابهمنه الحرّه نندبها
ابفضلها الحاجه مگظيه * فَرج كِل مِعضله هيه * هاي اسرار الهيه
ابفضل حبها لبو اليمه * اشتريد الباري ينطيها
----------
أريد اسأل الجربوها * هم واحد رجع خايب؟
لو كل الندبها ايفوز * وبيده حاجته جايب
لقب باب الحوائج صح * عقيلة آل ابو طالب
كريمه وما ترد أحّد * ندبناها ونطتنه اشگد * لمسناها لمس بليد
إذن منّ الغباوه اتحيد * عنها وتغفل اعليها
----------
النِطت أربع فِدائيين * فِدوه الضَنوة الزهره
مو عجبه تِكون الباب * الِكل حاجةِ المتعَسره
كِل هذا الحَچي الگِلناه * وإلها ما نِصل شَعره
ألله الفاطمه ايجلها * صَفي نِيّتك إلها * تنظر حاجتك حلها
إقره الفاتحه وانخه * تِكرمك والله بيديها