ميلاد الحسين ع -- اسجد ياكمر هذا ضوه حسين

ميلاد الحسين ع
-
-
-
-
المستهل
---
أسجد ياگمر هذا ضوه حسين-- وسلم عالنبي وصلي ركعتين
ريحانة نبينه -- أشكبر الفرحه بينه
---
أسجد ياگمر شتشوف العيون
نور حسين قدسي ضوّه للكون
البس من ضيائه ثوب كل لون
وصلي عالنبي ويه اليصلون
من نور العرش نوره تلاله --- من جده النبي حسنه وكماله
نوّر للمدينه -- أشكبر الفرحه بينه
--
ضوّه عالمدينه ونوّر الطور
وبمكه يشع من طلعته النور
وتفوح بمنى من عنده العطور
ورضوان بجنانه ايبارك الحور
حور العين نثرت عطر فواح -- طشت ياسمين او ورد قداح
وتزينت بزينه -- أشكبر الفرحه بينه
------
حور العين تتكحل ابعطره
وأملاك السمه أبهيبه تنظره
جبريل الذي أعلن البشره
هناه للنبي وبارك الزهره
فرحت للحسين أگلوب وعيون -- يامحله الفرح ويه اليحبون
ابميلاده الولينه -- أشكبر الفرحه بينه
----
ورّد غصن من شجرة محمد ص
عليه طير الشفاعه اليوم غرّد
كل كوكب حسيني لحن أنشد
بحسين الشفاعه اليوم جسّد
أفرح يالمحب وأنشد أناشيد -- عيد اليوم اجمل واحله كل عيد
وبنوره اهتدينه -- أشكبر الفرحه بينه
----
نوره نوّر الكون ونظامه
وبي النه نهج درب السلامه
حسين النه شرف النه كرامه
صار بكل گلب شوگه وغرامه
حبه بكل گلب بانيله كعبه -- حبه الماي من نعطش نشربه
أشگد غالي علينه -- أشكبر الفرحه بينه
---
حب حسين هوه درب الايمان
آيات أشكثر وضحها قرآن
واليجهل حسين بعمره خسران
دنيه وآخره وبگبره ندمان
حسين الكل محب باچر يحضره -- مايحزن لون ينزل بگبره
والزهره تعينه -- أشكبر الفرحه بينه
--
سيد عدنان الحمامي