شريفه بنت الامام الحسن ع

شريفه بنت الحسن ع

..
المستهل
..
ياشريفه ...بالعزاز امحلفچ وسكنه ورقيه
ياشريفه ... من أديچ الطلبه رايدها بديه
ياشريفه – ياشريفه
......
ياشريفه أليجي يمچ ماتفشليه
أيحصل وخايب أبد لا ماترديه
منچ شماطلب من جودچ تكرميه
شكثر چم محتاج اجه او لا ماتزعليه
ياشريفه ... نظره رايد منچ بعطفچ عليّه
ياشريفه ... من أديچ الطلبه رايدها بديه
ياشريفه .. ياشريفه
......
أنتي ابوچ ألحسن ميفشل الضيفه
مايرد محتاج لليدخل مضيفه
ينطي للمعوز شمايطلب بكيفه
وآنه أدگ بابچ أجيتچ ياشريفه
ياشريفه ... ما أرد فشلان والحسرات بيه
ياشريفه ... من أديچ الطلبه رايدها بديه
ياشريفه ... ياشريفه
.......
يالذي أنشم بضريحچ عطر جنه
ياالكريمه وطيبه يالبيچ المحّنه
عدنه حاجه أمعسره تگظيها ألنه
والذي مهموم اجلي اهمومه عنه
ياشريفه ... بالكرم أنتي كفوو يالهاشميه
ياشريفه ... من أديچ الطلبه رايدها بديه
ياشريفه .. ياشريفه
......
عمچ العباس معروف بسخائه
كفو للمحتاج ويكرمه بعطائه
بالحسين الحّلفه ايلبي ندائه
بهل الكرامه خصكم الخالق سمائه
ياشريفه ... لليطب ضيفچ تكرميه بالهديه
ياشريفه ... من أديچ الطلبه رايدها بديه
ياشريفه .. ياشريفه
.....
ولوا أنتي أهنانه وحدچ ياغريبه
للتنخه بيچ صرتيله حبيبه
وشارتچ شافوها أحبابچ عجيبه
للذي رايد طبيب انتي طبيبه
ياشريفه ... شمس رحمه وعافيه أعلينه ضويه
ياشريفه ... من أديچ الطلبه رايدها بديه
ياشريفه .. ياشريفه
.......
چبير بختچ والمضيفچ من أجينه
بحضرتچ للباري مدينه ادينه
أبجاهچ العند ألله يفرجها علينه
وكل موالي بطلبته گريها عينه
ياشريفه ... مثل ابوچ الحسن چفينه سخيه
ياشرفه ... من اديچ الطلبه رايدها بديه
ياشريفه ... ياشريفه
...
سيد عدنان الحمامي
..