جديد - استشهاد الامام الكاظم ع -- يالرضا اعلن حداد

-
المستهل
--


يالرضا اعلن حداد --- والبس الليله السواد
وأحضر البغداد أبوك أتشيعه ويه الجواد
----
يالرضا احضر الليله والدك ودع حياته
بعده بالقيد الحديد ولفه سجانه بعباته
عابد وزاهد بسجنه چان ميفارگ صلاته
هوه رادك تجي يمه من گبل ساعة وفاته
ليش عفته بهل السنين --- ونته عالوالد حنين
عجب مافد يوم وينه ايناشدك عنه الفؤاد
----

سنين أبوك أيغيب عنك ماگلت هالمده وينه
عله دربك تربي عينه والد ويشتد حنينه
بالسجن رادك تحضره بشوفتك تبتهج عينه
غربه وسجون وقساوه يالرضا الله اليعينه
لاضوه بسجنه ظلام --- عينه ماتاخذ منام
كاظم الغيض بحياته حمل كل الاظطهاد
-------
حسين راد ايحضره الاكبر ونته يالكاظم أوليدك
يحضر اتريده ابمماتك للمنيه ايسبل ايدك
يالرضا عنه بعيد بحسرته ظل ويريدك
لادمع تبچيله ينفع مابعد دمعك يفيدك
محب لو ودع حبيب --- جرح فگده مايطيب
غدرته الماخافت الله ناس من اهل العناد
-----
شيعته كلها بحزنها يالرضا عدها مصيبه
حضرت اتشيع ابوك اجنازته ظلت غريبه
ما أجوا اهله وأخوته شالسبب ولله عجيبه
ماوصل ليها الهواشم هالخبر وتسمعه طيبه
بفزعه للكاظم يجوه --- بهيبه من ايشيعوه
والاجر لجل المصيبه يكون من رب العباد
-----
دنيه هاي أويه الاطايب لارحم بيها عليهم
مكنّت ناس الحقوده خلت السلطه بديهم
حاربوا عترة محمد لا رعوا حرمة نبيهم
لو قتل بالسيف لو سم ياهو يسلم بالله بيهم
الرايد بعينه يشوف --- واقعة ارض الطفوف
الجثث من ظلت بدمها عالترب برض الجهاد
----

نودعّه الباب الحوائج والظماير جرح بيها
انغسله انچفنه انشيعه نعزي للأمه نبيها
وفاطمه الزهره تجدد هالحزن خيم عليها
نشارك أوياها بعزاها ونبچي وياها البچيها
فاطمه بكل المحن --- تذكر الچبد الحسن
وتذكر امن اطشروا اولادها ابكل البلاد
----
سيد عدنان الحمامي
--
-