وفاة الجواد ع..... عالجواد ومحنته

.
المستهل
.
عالجواد ومحنته... لبست اسود شيعته
الكاظم اليتلگاه... وشيعته كلها اوياه
لبست اسود شيعته
.
ياالكاظم دمعتك خلها هماله
أتلگاه للجواد وعاين الحاله
وأگعد لو ردت ياالكاظم أگباله
سم النال چبدك چبده هم ناله
ياجرحنه الماشفه.. مصابك وشنوصفه
بالحزن كل امته...
لبست اسود شيعته
....
أتلگاه للجواد وياهظم عنده
بكظم الغيظ اجاك ومنگطع چبده
نشده الياسبب والياجرم نشده
ههم مثلك غريب بغربته وحده
للنبي غيبوا بدر... سمته چفوف الغدر
گطعوها المهجته... لبست اسود شيعته
..
خصمه غيبه ياوسفه من دنياه
يغتاله عليمن سولف انته اوياه
مثل ماتنغدر هذا الغدر يدناه
لا أهله واخوته الغمظوا عيناه
ناحت أملاك السمه... وحزنت اعليه فاطمه
ياعظمها أمصيبته... لبست اسود شيعته
.....
لا حضروا هله لا أجوا ولد العم
هلاله غاب وانصب للحزن مأتم
ياالكاظم ومنكم ياچبد يسلم
لو بالسيف لو بالينغدر بالسم
بالطفوف الدم جره.. چم جسد فوگ الثره
حسين سلبوا جثته... لبست اسود شيعته
.....
يازاهد إليسلم بيكم وعابد
بهذا الحال واحدكم بعد واحد
بني أميه وظلمهم للوكت شاهد
الجرايمهم كلمن يطلع رايد
ينشد كربله عنهم... لاطفل السلم منهم
وچم شباب وچم فته... لبست اسود شيعته
......
ظلم تهجير وشگد نكلوا بيكم
ورثوها البني العباس اعاديكم
أخذوا من بني اميه الظلم ليكم
كلها اتجمعت بحقادها اعليكم
حاربوا دين السمح.. كل جريمه تتضح
هالظلم واليامته... لبست اسود شيعته
.
سيد عدنان الحمامي
.
.