الى انصار الامام الحسين ع اقول (394)

الى انصار الامام الحسين ع اقول
(394)
&&&&
(1)
صاحت الانصار جينه لكربله..نفدي هاي ارواحنه كلنه اله
الك ذني عيوني..تسمع العادوني
افدي كل عمري الك والعايله
&&&&&&&&&&
صاحت الانصار وياهم حبيب..اليوم يمولاي بس انته الحبيب
نصيح لبيكم وللداعي نجيب..انضحي هاي الروح الكم موعجيب
خلهم يسمعوني..الرادو ايزلوني
خلي يسمع هالحجي كل المله
&&&&
هبت الانصار لحسين وتصيح..احنه كلنه اجنود لحسين الذبيح
هبت ويانه ملسمين ومسيح..ومايهمنه الطاح والبينه جريح
لو سهم يرموني..يطيح بين اجفوني
اليجي مولاي بروحي نتحمله
&&&&
اتحمل الطعنات صاحت هالجموع..مثل عابس ذبت هواي الدروع
ماتهاب الموت ماتقبل رجوع..وكالت وي حسين تبا للخضوع
خلهم يموتوني..بكل كتر وذروني
ندري احنه يهون بينه اتعلعله
&&&&
مايهمه الموت اصحاب الامام..خيرت الله البيقه والسلام
اختاره الباري وبحسن الختام..تنطق الافعال ماتحجي كلام
خلهم يصلبوني..وخلهم يعذبوني
شعدهم الكفار خلهه تفعله
&&&&
احنه عاهدنه العقيده بكل شرف..كل رجل انصاري بالمبدء حلف
يوم شاف النور وبعينه انكسف..ماعرف كلمه تعذر يا ااسف
صاح يالتردوني..وياكم انتو اخذوني
كل عدوكم بالنفوس نقاتله
&&&&
نقاتل الكفار واصحاب الشمر..فد عزم واحد لبت هالامر
صاحت الانصار نفديه العمر..نمشي وي حسين لو نسحك جمر
خلهم يذبحوني..كلهم يظلموني
لازم بنفس الفعل ونعامله
&&&&
خادم اهل البيت
ابو علي السعيدي
&&&&&&&&&&&&&&&&&
(2)
هاي لليله هاي لليلة… .خامس ليلة من عاشور
**********
هاي الليله تحل علينه..دمعات رقيه وي سكينه
وانصار حسين وسبعينه..دمعات التنزل وتفور
&&&&
أذكر عابس وجنونه..يوم عليهم صك اسنونه
ومفتوحه وي الموت عيونه.. بحب حسين اصبح مسرور
&&&&
اصحاب حسين بهل اليوم..واحدهم ماشاف النوم
يحجي وي اصحابه ويكوم..يتنطر طابك عالدور
&&&&
حبيب البلغ كل الناس..كاللهم رايد احساس
غيرتكم مثل العباس..يوم اعليهمى انته تثور
&&&&
والحر اسعد واحد بيهم..اول واحد تقدم ليهم
بصوت العالي يناديهم..واصبح هالحر ومشهور
&&&&
وجون الضحه وصاح حسين..منك رايد فد امرين
لوني ورحي هنه اثنين..وياكم رايد محشور
&&&&
واصحاب الحسين الضحوله..مابيهم واحدهم لوله
وكفو لحسين وكالوله..بدمك مولاي منصور
&&&&
وياك احنه وين تريد.. ميهمنه الظالم ويزيد
امرنه بس مولاي الحيد..مايمنه الظالم والجور
&&&&
ميهمنه الظالم وافعاله.. ولتغرنه كثرت ارجاله
واحدنه الموته تحلاله..وياكم كلبي الناطور
&&&&&
خادم اهل البيت
ابو علي السعيدي
&&&&&&&&&&
(3)
استمع مني حجايه.. يعباس .....امك واريد اربايه.. يعباس
&&&&
ام البنين تنادي..وتصيح وين اولادي..انت كفيل وحادي
راعي العلم والرايه..يعباس
&&&&
اسكينه نادت يبطل..انت الرجه وانت الامل..يابعد روحي والاهل
عطشانه اريدن مايه..يعباس
&&&&
انخاك يابن حيدره..ياعمي شوف اللي جره..النار بيه اموجره
جيتك الك شجايه..يعباس
&&&&
انهض يبو الغيره الشهم..وراويه سيفك هالزلم..عباس يانعم الاسم
نعم الاخو الوفايه..يعباس
&&&&
لو صكت اضراس الحرب..انته بااوله التطب..وبيدك تخبطه السحب
وبيدك تدك الثايه..يعباس
&&&&
يارافع الرايه الي..وانته تحدي بمحملي..عباس ياغيرت علي
تكظي العمر ويايه..يعباس
&&&&
وصاك بينه حيدره..ياعمي سبع الكنطره..عمتي سبيه محيره
تنادي راعي الرايه..يعباس
&&&&&&&
خادم اهل البيت
ابو علي السعيدي