]قصائد وابوذيات ونعي للعليه ع اقول (382)

قصائد وابوذيات ونعي للعليه ع اقول
(382)
&&&&&&&
(1)
للعليله
نعي
***********
لن صوت العليله يصيح بويه حسين عفتوني
وحيده بلا ولي وياي بويه بهم تخلوني
عليكم ما أ بطل نوح بويه تعمه اعيوني
شگل الناس يابويه ولو عنكم يسالوني
هلي غياب يابويه بسفر يمكن يذكروني
وحشه الدار تسالني اريدنكم تشوفوني
اخوتي وعمي العباس مااظن بعد يلفوني
انت الواعدت بويه كلت لازم يتبعوني
منكم لا خبر هاليوم لاطارش يواسوني
اركان البيت يابويه ابچيهه ويبچوني
**********
بصوت الفاكده يابوي..وحداي
وعليله بلا اهل ظليت..وحداي
لمن غادر ظعنكم راح..وحداي
متت يابويه من ذيج المسيه
*******
تعلمت البواجي ونوح..والون
وشفت حسرات مرة علي..والون
وين ارحلتو ياخوان..والون
وبقيت اوحيده محد نشد بيه
&&&&&&&&&&&&&&&&&&&&&&&&&&&&&&
(2)
شلون من حل الوداع..وارفعت بويه الشراع
فاطمه انه العليله..حملي بويه من يشيله
انت ياحلو الطباع
&&&&&
فاطمه انه العليله.. بويه عدمن ودعتني
بدار وحشه ولا خليل.. انت بويه من عفتني
يوم حلت هالمسيه..بويه هم انته اذكرتني
حالي ياحال الرزيه..ريت بويه ولاشفتني
انت بن حامي دخيله..وحشه يابويه هالليله
ابعدو عني السباع
&&&&
وحدي بويه من عفتني..شلون من جلجل الليل
داركم ظلت خليه..وحملي يابويه ثجيل
انت وصيت بوصيه..ومااظن عني تطيل
حرمه ظلت وبنزلكم..انت ابن حامي الدخيل
سفرتك يمكن طويله..والبعد ماليه حيله
امركم عندي مطاع
&&&&
عيني تربي بويه الكم..وعالدرب عيني ربيه
اهنا ياللي عفتني..بنوح والهم والااذيه
ردت كون انه بضعنكم..لو تحل بيك المسيه
خادمه افرش افراشك..وانه اسليلك رقيه
اخدمك خدمه جليله..حتى لو انه عليله
اليوم احسن بالضياع
&&&&
يااشد موقف عليه..صار عندي ومانسيته
يوم من اظلمت دارك..وردت شخصك مالكيته
صحت بس الصدى ردلي..وياظلع مني حنيته
جان كل همي يبويه..عمري بجاهك كظيته
ترده عني اللي يعيل..بجاهك وجاه الكفيل
وعني ادافع دفاع
&&&&
يوم من غرب ضعنكم..وابعدت يابويه عني
هاجت عليه ضنوني..عيوني بس هنه السلني
وظلمة الليل وحشته..وكثر حسبات اللفني
اعاين بدار الاحبه..ولاطلع من شفتي سني
بس اعاين عالجليل..وبالنظر اصفن واطيل
وعيني تجول البقاع
&&&&
ارتضيت الوحده بويه..وايقنت انه البقاء
من شفت حمل ضعنهم..واركبت كل النساء
ارجعت مكسوره خاطر..يوم من حل المساء
واشكرت ربي لحكمته.. وارفعت أيد الدعاء
واعرفت انه الحصيله..عيشتي ابقى عليله
وانتظر يوم الوداع
&&&&
خادم اهل البيت
ابو علي السعيدي
&&&&&&&&&&&&&&&&&&&&&&&&&&&&&&&&
(3)
يالعليله..يالعليله..بنتي اصبري عالمصاب
يالعليله.. يالعليله..بويه افراكج عذاب
&&&&&
يالعليله يالعليله..اليوم ناوين السفر
يالعليله يالعليله..هذا مكتوب القدر
يالعليله يالعليله..ادري مامنه مفر
يالعليله يالعليله..بويه ماعندي جواب
&&&&&
ياولينه ياولينه..شلون تتركني وتروح
ياولينه ياولينه..تزيد حزني والجروح
ياولينه ياولينه..ابقى كل عمري انوح
ياولينه ياولينه..اسمتع مني العتاب
&&&&&
يالعليله يالعليله..اني اوديلج اخوج
يالعليله يالعليله..همه لازم يعتنوج
يالعليله يالعليله..بغيبتج يتوافدوج
يالعليله يالعليله..الج هم ابعث خطاب
&&&&&
ياولينه ياولينه..موحشه الدار بغيابك
ياولينه ياولينه..والوكف ينشد ابابك
ياولينه ياولينه..كلي شنطيهم جوابك
ياولينه ياولينه..انخه جدي بوتراب
&&&&&
يالعليله يالعليله..رحلتي بويه طويله
يالعليله يالعليله..وانتي يابنتي عليله
يالعليله يالعليله..وطاقتج جدا قليله
يالعليله يالعليله..انتي تبقين الصواب
&&&&&
ياولينه ياولينه..وداعت الله ياالولي
ياولينه ياولينه..ودعت امي وهلي
ياولينه ياولينه..خالي بويه محملي
ياولينه ياولينه..احتمل بويه العذاب
&&&&&
خادم اهل البيت
ابو علي السعيدي
&&&&&&&&&&&&&&&&&&&&&&&&&&&&&&
(4)
رقيه اتودع اليوم العليله..تكله فركتج يختي ثجيله
نوينه عالسفر يختي نوينه..ابونه اهل العراق ماكتبينه
بس حملج بقه ربي اليشيله
&&&&&&&&&&&&&
بس حملج بقه وانتي غريبه..بديار الاهل هاي المصيبه
اناجي الباري بحسين وحبيبه..سالم ربي يرجعه ويجيبيه
لخيتي فاطمه هاي الحنينه..ابوي الواعدج يوفي دينه
وهاي الرحله ياخيتي طويله
&&&&&
اخت وتودع اخته بهالمسيه..تكله امفارج يصعب عليه
لاجن هالامر مااظن بديه..نروح احنه لااراضي الغاضريه
اسمعي كلبي صوته اونينه..عزيزه يختي وصعبه علينه
بس دمعي عليج اليوم اهيله
&&&&&
العليله تعاين وتنظر رقيه..تكله شلون يختي بهل المسيه
وحيده بدار وحشه تحل عليه..وصيتي يختي وذمه الوصيه
عليج بوالدي انتي تسالينه..يودي اطروش اليه للمدينه
اخوي ايودي لو عمي خليله
&&&&&
تناشد فاطمه وعيونه تهل..تكلهه يارقيه مابقه ظل
المن خيه انشد انه اسئل..اظلن عالدرب لمن يجي الخل
اعاين عالدري يرجع ولينه..واسمع صوته اينادي علينه
تعالي احضنج بنتي الاصيله
&&&&&
رقيه شافت الشكوى من اخته..وجلمات العتب حيل فجعته
تكله بصوت محني المته..الحرمه بلا ولي عدمن عفته
تصيح بصوت مهمومه وحزينه..نتنطر احد منكم يجينه
ورغم كل الالم حملي اشيله
&&&&&
تتوسل بااخته تكلهه ضلي..انه وياج ظل وانتي ضلي
يختي بالعرب ماكو وي حلي..تسليني بكلامج واني اسلي
نقسمه الهم ياختي بدينه..ونتشارك بكلشي لو بجينه
امشي عليج حماي لدخليه
&&&&&
خادم اهل البيت
ابو علي السعيدي
&&&&&&&&&&&&&&&&&&&&&&&&&&&
(5)
******
لا تسافر بويه تتركني وتروح..وبيدك تسلمني انته للجروح
بويه واعدني وعد..بروح اخوي البلمهد
لاتسافر
*******
لونويت السفر بويه لاتغيب هواي عني
مثل حال النبته حالي لو كطعت الماي مني
راح اسليهن عيوني بعدك واختبر وني
لاتظن اضحك يبويه وينكشف للهوه سني
الفرح عني بعد..ابرحيلك يالوتد
لاتسافر
***********
راح اروزن نفسي بويه بالصبر من هل المسيه
ولو رحت يابويه عني ورحت لاارض الغاضريه
بلكت اتوصي اخوتي لو عمامي توصي بيه
تدري بعدك عني بويه شبر من عندي المنيه
راحو الجانو سند..بدنتي همه العمد
لا تسافر
***********
كلبت سيرت حياتي بويه هاليوم العصر
اعرفت بيهه البدايه بيك يابويه افتخر
واجبك لازم تطيعه وانت مأمور بامر
ربك اختارك لدينه لو شهاده لو نصر
انت نلت الحسنيين..بدمك اثبت الدين
لاتسافر
***********
ردت بس جلمه يبويه وياك اروحن وي رقيه
ادري يابويه عليله وانت خايف هم عليه
اعرفت يابويه حاير من كلت ذيج المسيه
ودعتني بعين كلبك وماردت ليه الاذيه
ظلت عيوني عليك..بجلمه وحده ترتجيك
لا تسافر
************
من كلت يابويه نرحل والتظل بس فاطمه
عاين بويه عليك وشفت بس لون السمه
روحي ظلت تنتظركم بدار وحشه هايمه
اعرفت معنى الرحيل وجان بيه الخاتمه
كلت اخوج ويعتنيج..لو يرد عمج عليج
لا تسافر
************
مودع بالله يبويه من شفت سار الظعن
ودعت سكنه ورقيه وشفت بالروح انلون
من شفت ابعد ظعنكم اعيون يابويه انعمن
صرت يابويه غريبه رغم داري والوطن
الوطن انت اليه..انت ياروح الزجيه
لاتسافر
************
خادم اهل البيت
ابو علي السعيدي
&&&&&&&&&&&&&&&&&&&&&&&&&&&&&
(6)
*****
اهلي عافوني ومشوطول سفرهم
واعداني حسين كال ايرد خبرهم
*********
اهلي العافوني وحدي وراحو لديره غريبه
بين حزني ونوحي بويه عشت ذكراه المصيبه
الراح يابويه من اديه وكلي بالراح شيجيبه
هاي دنيه بويه صعبه والاشد بيه العجيبه
انتظر بويه تجوني كل مسيه..وانطر اخبار اليجي من الغاضريه
عيوني يابويه تناطر عالدرب يوصل كمرهم
**********
تحملت بويه الهظيمه من رحت يابويه عني
بويه خاواني الدمع انه منه وهوه مني
الاشد شفت عليه لو اجه الليل وهظمني
واكعدت عالدرب اناشد واعتذر للي سئلني
لو نشدني وسئل يابويه عليه..انتي من ياديره انتي يل البنيه
مني ينتظر الجواب اشد من جويه جمرهم
**********
من مسه الليل وعليه وحدي وبداري حزينه
استمع للبيت بويه حسرته وياي أو أنينه
بين جدراني الحزينه اصبحت انه سجينه
ونظر لمهد الطفل خالي ماتسمع بجينه
هم ترد ايامنه ونكعد سويه..وترجع انت لدار ك من الغاضريه
اتذكر يابويه خواني من جنت بزغرهم
***********
سالت الدمعه عل خدي وصحت صوتي يامجيب
انت يارب اللي تعلم وتعلم بحال الحبيب
لاابو اليمي ويخفف ولا حضر يمي طبيب
متى ياربي تعوده ويرجع عليه المغيب
نحجي ونسولف يبويه انه ورقيه..صعبه يابويه اليفارك ويترك بداره صبيه
اهلي غياب ومشو ادري هم عدهم عذرهم
********
حلم يابويه بحياتي وكل طفل يتمنه بيه
يحلم بحلم الطفوله والابو يوم اليجيه
ينتظر يرجع ابوه وهوه فاتح كل اديه
يحضنه يشيله عل صدره يكعد ويسمح عليه
يمسح براسي ايده وهم عليه..يخاطب ابنيته ويكله ياعزيزه الفاطميه
ابقى ياهل الناس كل عمري انتظرهم
***********
خادم اهل البيت
ابو علي السعيدي
&&&&&&&&&&&&&&&&&