للرضيع. من دمع تبچيله. بلليها الشيله

عبد الله الرضيع ع
..
..
..
المستهل
....
من دمع تبچيله – بلليها الشيله
راح عبد الله أنذبح يمه
.....
من رقيه أمن البواچي بعد ما الها عذر
يارباب اتصيح أبويه لايطيح أمن المهر
جاب عبد الله ذبيح ويجري دمعات الصبر
بويه ماخليته يمنه طفل وزغير عمر
كل رحم مابيهم ... ليش أخذته ليهم
طفل وبدمه سبح يمه
.....
چان ظل ابمهده يمي ومن دمع عيني ارتوه
ولوا بويه هوه وآنه اثنينه أعطاشه سوه
وغصن گلبي من ظمايه وخوفي والرهبه التوه
وماتمر بريتي أحسّن حتى نسمات الهوه
عمي راح ومايرد --- أيجيب رادنه الوِرد
الماي من جوده نضح يمه
.......
بويه يحسين أنته ظامي العطش صاحوا بالخيم
ومن شفت عبد الله خذته وصابه رماي السهم
ورتوه بدم الوريد بدمه عبد الله أنفطم
شلون ونته بعطش روحك وحملت هذا الالم
هاي رميات القدر --- گلبك وگلبي أنكسر
وگلب شماتي فرح يمه
.......
شلون حالچ يارقيه وكلشي شفتي بعينچ
رجع بصوابه الرضيع ويبچي جابه أحسينچ
وينچ أو وين المصايب يارقيه وينچ
هذا عبد الله ذبيح بهاي الله يعينچ
ظامي مات بنبلته – من وريده ذبحته
وچبد الحسين انجرح يمه
....
گومي يمه يارقيه هذا مذبوح الطفل
خاف بعده بعطش گلبه وصوبه رامي النبل
شربيه دمعة اعيونچ يالحنينه من تهل
مايفك عينه عليچ وما أظن بعده عدل
گعدي يم مهده بعد – لو سمع حسچ گعد
عسى يومي لاصبح يمه
......
بويه بيك شلون ونته العطش ذوب مهجتك
شلون لو بالحجر صابوا يبو الاكبر جبهتك
شلون وخيول بحوافر تجي تسحگ جثتك
شلون لو سهم المثلث بعد گطع چبدتك
لو عدوا أتولاني -- طفله من يرعاني
باليتم آنه أتضح يمه
.......
سيد عدنان الحمامي