أخبريني يسامرة ... قصيدة عتاب لسامراء

((المستهل))

يسامره يسامره ...... اخبريني يسامره
 چم أمصاب برضچ صار ...... جرَّعنه الغصص مره
اخبريني يسامره
***********

يسامره بگلب مهموم .. عناي والچ گاصد
بيوم العسكري جيتج .. نويت أزيارتچ رايد
ماخذني حنين الروح .. الچ وبشوگ متزايد
ويطويني جناح الشوگ .. وبگلبي اللهب واگد

&&
الي جمره الي جمره ..... بدليلي أتشوط الي جمره
وصرت أنشد والي حصره ..... جرعنه الغصص مره
اخبريني يسامره
********
يسامره الي نشده .. وياچ وحضَّري جوابچ
تدرين الگلب مهتم .. بهظمه ولوعة أمصابج
چم دلال بيچ أنصاب .. من أنصابت أطيابچ
وچم لوعه بگلب مهموم .. مگظومه أعله غيـَّابچ

&&
أهل عبره اهل عبره .... لمصابچ أهل عبره
وتشب ابكل گلب جمره.... جرعنه الغصص مره
اخبريني يسامره
********
عن أمصيبة الهادي .. يسامره دحاچيني
وعن چبده التلوه بسم .. وعن همه أخبريني
صوريلي الرزيه أشلون .. و خلي أيهل دمع عيني
ومن عظم المصيبه هاي .. أنه المجروح وآسيني

&&
متاثره ومتاثره.... انوح وروحي متأثره
وهل عبره أثر عبره..... جرعنه الغصص مره
اخبريني يسامره
********
اخبريني يسامره .. عن العسكري وهمه
بيا سايه اليطلبونه ... بيا جرم أنهدر دمه
شلون السم مردهه احشاه .. ولاناصر فزع يمه
شلون أمصاب هز الكون .. وخله الشيعه مغتمه

&&
أنگضه عمره أنگضه عمره.... بشبابه وأنگضه عمره
وصيح أمصيبته كبره .... جرعنه الغصص مره
اخبريني يسامره
***********

يسامره الگلب مالوم ... أبد مابطل أونينه
على گبه ومنايرهه .. هدموهه أعادينه
چانت رمز عزتنه .. وعنوان الفخر لينه
شلون أرذال وصلتهه .. نواصب حاقده أعلينه

&&
تهد گبره تهد گبره.... الهادي تهد گبره
وگبر أبنه الحسن وياه.... جرعنه الغصص مره
اخبريني يسامره
*********
جرح الصار ماينراف .. بركان ومنو يخمده
احفاد ابن أبي سفيان .. لمقامه وسفه تتعده
نواصب وبضوافر سم .. الرسول الله فرت چبده
يبو الغيره دشوف اعداك .. عجيبه وطالت المده

&&
وكت عسره وكت عسره .... يمهدينه وكت عسره
نريد الثارك أتحضره .... جرعنه الغصص مره
اخبريني يسامره
***********

اسئلكم الدعاء
بقلم محمد ابورغيف

مشکور وجددا" جید

ربي ايبارك في جهودكم

احسنتم كثيرا




عظم الله اجوركم واجورنا بمصاب ابي عبد الله الحسين ع

لكم منا دعاء بالعافيه

والتوفيق ان شاء الله

تحياتي ودعائي

أبو جنان
السيد الحمامي
لكم وافر التقدير والامتنان على المرور الكريم
دمتم برعاية الرحمن