هل محرم والحزن

هل محرم والحزن مض بينه - وكل محب من دم تهل بي عينه

يا شهر عاشور هيجت الحزن - چم گلب ظل بيك بس ينعه ويون
بيك زينب بالألم ظلّت تحن - وانفجعنه ابشهرك ابوالينه

هلال شهرك يا محرم بس يهل - الدمع بي من دم على العتره يهمل
ينذبح ويلاه بيك أصغر طفل - ومن دمه نحره العده امروّينه

بيك الاكبر طاح سابح بالدمه - بعد ما زلزل الكون ابصارمه
جثته بسهام وسيوف امخذّمه - ابكربله الأكبر بگه امگطعينه

القاسم ابن الحسن بيك ابدمّه طاح - وعجّت العصرين لاچن بالنياح
عرسه ويلي ايصير بسيوف ورماح - القاسم ابدم هامته امحنّينه

وعالشريعه طاح شيّال العلم - راس ابو فاضل ابعامود انهشم
وتنطفي عين الگمر بَشرس سهم - ومنّه گطعوا بالغدر چفّينه

رجع منّه حسين محنيّ الظهر - ايصيح ظهري عگب عباس انكسر
يا محرم وانرمه ابذاك الحجر - وما إجاه امعين الله ايعينه

وطاح ابو اليمه على الغبره جريح - وتسع ميه والف جرح ابدم يسيح
وينذبح بيك وننادي يا ذبيح - وبالحوافر صدره امهشمينه

يا محرّم هاي عملة كربله - اميسّره العيله ودمعها هامله
وبعد چم صوط ابحقد عالعايله - چم متن بسياطهه امكسرينه

بيك زينب صاحت ابدمع ايهلي - گوّضوا بالحرب كل گومي وهلي
لحّگ علينه يحيدر يا علي - ابمجلس ايزيد بحزن تلگينه

يا محرم لچن ننطر بالونين - المهدي يطلع يظهر النصرة الدين
ابكربله اينادي يثارات الحسين - واحنه كلنه ننطر المهدينه