...
.. المستهل
.....
يحسين الك من رديت .... أشتم عبير ترابك
.....
من اليسر لهل البخت ردينه
هاي اربعين انهار من أمشينه
اللهم حنين شكبره هذا البينه
حنينه ألكم يخوتي حنينه
بعد المفارگ حنيت ... أشتم عبير أترابك
......
بهاي المصارع يخوتي عفناكم
مشونه من يم الجثث شفناكم
معونه ماقبلوا نظل أوياكم
واليوم بثياب الحزن جيناكم
من الگلب دمعي أبچيت ... اشتم عبير اترابك
.....
يحسين گلب أختك تراهو أمحير
هاي أم الاكبر تنشد اعله الاكبر
بممشاها كل ساعه تگوم وتعثر
يبني تصيح أعليك چبدي أتفطر
يالاكبر او يمك جيت ... أشتم عبير اترابك
......
ورمله يبو الاكبر تريده الجسام
عريس حگها لو بچت ماتنلام
أوحيّد وحرموها أمن أبنها الظلام
مادام أبنها ايعيش الها مادام
نادت أوياها ناديت ... أشتم عبير أترابك
.......
عاليرتضع عبد الله تنشد أمه
عافته النبله بمنحره وبدمه
وين أندفن يالحد صاحت ظمه
أبني واريد بمنحره أشتمه
عبد الله بيّه أشخليت... أشتم عبير أترابك
.....

وآنه لخويه اللي كفلني أشتاگيت
راسه أعله رمحه ريتني ميته ريت
حاضر يشوف أخته بيسرها أتمنيت
بس عفته وبلايه چفوفه ومشيت
عگبه غريبه حسيت ... أشتم عبير اترابه
......
مصيبتنه ماصارت يخويه عالناس
امشينه الدرب تحرسنه غربه الحراس
لا علي الاكبر لا أخويه العباس
وكلسا يجيبولي ويراووني راس
بروس أخوتي من أمشيت ... أشتم عبير أترابك
.....
سيد عدنان الحمامي
..