يحسين عشاگك نظل وبحبك انجنينه
لوالف ذبحه ننذبح يبقه الولاء البينه
------------------------
يحسين چم عابس الك ينبض وفه شريانه
للموت يتحده ابشرف بمحبتك يتفانه
مجنون كل واحد صبح ياسيدي عنوانه
نتعنه يم گبرك زحف لوگطعوا رجلينه
---------------------------------
شگد حاربونه اتصوروا عن حبك ايمنعونه
احياء لجل امحبتك يا سيدي دفنونه
خابوا وماگدروا بعد ضحينه من شافونه
منموت حبك سيدي هوه الذي ايغذينه
-------------------------------------
ابساحة ولائك سيدي يحسين كلنه اجنودك
ياباذل اهلك واخوتك كلهم لجل معبودك
من عزمك البينه عزم والزود بينه زودك
ابمال وبنين او باالدمه منوفي لو ضحينه
----------------------------------
يحسين يالحبك شرف سجلنه من انصارك
ايحصل الشفاعه سيدي كلمن دخلها الدارك
يالبحر جودك مانشف يالتكرم الزوارك
لوصار باجر بالحشر بس حبك اينجينه
----------------------------------
كل واحد البينه صبح عابس ويفدي روحه
يابلسم انته الكل محب نورك يداوي اجروحه
للدين دمك ثبته ودمك يعلي اصروحه
ياهو الذي مثلك بذل حتى الرضيع الدينه
--------------------------------
انجدد عهدنه سيدي بالدم الك عاهدنه
انته الحبيب او لاتضن غيرك حبيب العدنه
بركان والله ينفجر وكت الغضب واحدنه
بالشده يتراجع ابد ياسيدي مابينه
-------------------------------