قصيدة مهرجان الكوفه مهرجان السفير الاول الثقافي
السيد عدنان الحمامي
***********
الكوفه تنتظر تحسبلك ايام ---- يافرحة اهلها وبسمة العيد
ثوب الحزن نزعت لبست الوان ---- بعد كل حزن هاي الكوفه متريد
يا اجمل فرح مقدمك ينذاع ---- وشفاف الامل غردّت تغريد
يمسلم فرشته الدربك رياحين ---- وهلهولة امعرسه توصل ابعيد
رغم مابعدت اعليك المسافات- -- الهدف تنقذ الامه بعزمك اتريد
لأن انته شهم وابن السلاطين---- لأن انته بطل وابن الصناديد
همك للعداله اتعمم اتريد ---- وماترضه اسيره الكوفه بيزيد
مرهم للجرح للكوفه طبيت ---- وحددت العلل بالناس تحديد
شتلة خير رايد تثمر الخير ---- وكلها اتنوش رايد للعناكيد
العبوديه ارفظتها بس مساوات ---- تتساوه الرعيه وايد بالاييد
وشجره من تفيي بعدل الناس ---- لاعبد اليظل تتحرر اعبيد
ويروي سلسلبيلك چبد محروم ---- لا اسود وابيض ماكو تحديد
تطش عطر الوفه وتوحد الناس ---- وبوحدة وطن ترفض التشريد
بشفاف الرعيه بسمة آمال ---- ومهيوبه تظل ناس الاجاويد
ظلمه ابلا گمر ماتنمشي زين ---- عن درب العدل لو حاكم ايحيد
ليش ابكل نفس مزروعه آلام ---- محرومه وتشم رايد هوه اجديد
وغيوم الدموع التمطر ادموع ---- اعليها النايبات اسهام تسديد
واسراب النوارس فرت اتخاف ---- من چف الظلم مايرحم ايصيد
وروح الكوفه شهگت رادت اتموت ---- لأن سم تنگط اعليها العرابيد
واجيت انته يمسلم تنقذ ارواح ---- وكل محروم جرحه ابجيتك ايهيد
سفير اتعينت وبأمرة حسين ---- والحان المجد تنشد اناشيد
لأن خالد بقيت وهذا ذكراك ---- وكل عام اليجي الهل المحفل انعيد
------