المستهل

................

يتيمه لبنيتك تعوف --- خذت عيني شلون أشوف

خذت عيني شلون أشوف --- يتيمه لبنيتك تعوف

كل أبو البنته حبيب --- ليش عن دارك تغيب

بويه --- بويه

.......................................1

مسلم اوياك --- ليش بويه ماخذتني ورايد اتروح

الله وياك --- خلي بس الهم اليه ونزف الجروح

دنية اهموم --- بويه ماعيش بغيابك شلي بالروح

مثلي حگها --- لحّد أيلوم اليتيمه التبچي وتنوح

منين لفراگك دوه --- وأحس مخنوگة هوه -- أحس مخنوگنة هوه -- منين لفراگك دوه

بس أشم عطرك أطيب ____ ليش عن دارك تغيب -- بويه بويه

...................................... 2

بويه مسلم --- يالعفتني ابلا وداع شلون بيه

روحي وياك --- يالخذتها ورحت يابويه امن اديه

كبر همي --- طفله وشكبره صبح همي عليه

ابچي الدموع -- سكنه واستني وتصبرني رقيه

گلبي الزغير يذوب - گلبي مو مثل الگلوب - گلبي مو مثل الگلوب - گلبي الزغير يذوب

أبو ايحن منين اجيب --- ليش عن دارك تغيب -- بويه بويه

..............................3

ذبل عودي --- وآنه غصن الورد غصني يذبل بساع

بويه افديك --- بعمري چان شريت عمرك لون ينباع

هالامل راح --- حلم وبحظنك أظلن هالحلم ضاع

بهذا زغري --- تريدني أحمل يبويه شحمل أوجاع

زغيره ما أگدر اجيك -ارد أشوف شصار بيك - ارد اشوف شصار بيك - زغيره ما اگدر اجيك

آه من هذا النصيب --- شلون عن دارك تغيب --- -- بويه بويه

.................................4

الأبو لو راح --- ألابن يحملها لچن عالبت مصيبه

بعد عينه --- لاحنان ولاعطف وتحس غريبه

هيبة الدار --- مو چنت مهيوبه بيك وألنه هيبه

دنية أقدار --- كل حبيب يودع بغفله حبيبه

ابچي ليل و بالنهار - دمعي شيطفيله نار - دمعي شيطفيله نار - ابچي ليل وبالنهار

بگلبي مايطفه اللهيب --- ليش عن دارك تغيب -- بويه بويه

.............................. 5

ياهوه الهاب --طير بيّه الوالدي حنيت أشوفه

جرح فرگاه --- بلچي أشوفه عدل والجرحي يروفه

ايحن عليه --- من يشوف ابنيته بعيونه العطوفه

أيطمن الروح --- بس على راسي يخليهن چفوفه

خايفه من هالزمان --بت واظل بلا أمان -- بت واظل ابلا أمان - خايفه من هالزمان

بلسم الجرحي وطبيب --- ليش عن دارك تغيب-- بويه بويه

................................... 6
وين يابت --- كون هم مثلي يتيمه اتسولف أوياي

عن ابوها --- مثلي انشدها تحبه چانت أهواي

آنه أبويه --- هالهوه الاشتمه چان وخيمة افياي

بي ألوذن --- هوه گلبي ومهجتي وسلوتي ابدنياي

يالعفتني ابلا حنان - بسمك اندب كل أذان - بسمك أندب كل أذان -- يالعفتني ابلا حنان

وينك اصرخ ماتجيب --- ليش عن دارك تغيب -- بويه بويه

......................

سيد عدنان الحمامي

....