ولدي اثنين بالمصرع – أنه زينب
ولاعنهم ذكر اسمع – انه زينب
مثلهم ماتجيب ابطون – ليش الولدي متذكرون
آنه زينب يالمواسين يحبابي اسمعوني
روس أولادي فوگ أرماح شفت بناظر أعيوني
صحيح أنتم حزن بيكم يخدامي وتذكروني
ليش أبولدي مافد يوم اسمعمكم تواسوني
اثنين أمن الولد عندي – أنه زينب
تذبحوا وأنذبح چبدي -- أنه زينب
لخويه حسين ويضحون – ليش الولدي متذكرون
ويه كافلي العباس خال ونعم من عنده
مثل ماغاليه چانوا عنده اغله من ولده
منا واحد ومنا يخليهم تحت زنده
ومن يشمهم الولدي يشمهم شمة الورده
أخويه الگمر دللهم – انه زينب
أولاد العزيزه أمهم – انه زينب
مثله بحرب ميهابون – ليش الولدي متذكرون
واحد گال يازينب يمّه عهد من عندي
أفدي خالي ابو السجاد روحي ومهجتي افدي
الثاني گال يايمه أضحيله وحگ جدي
قرابين لأخويه حسين أثنين امقّدمه ولدي
صحيح المثل كلمن گال -- أنه زينب
ثلثين الولد عالخال – أنه زينب
لخويه حسين كلشي يهون – ليش الولدي متذكرون
چان حسين من يشوف هذا العزم من عدهم
بحنانه اوعطفه لاولادي يحن ومثل والدهم
طلبوا للحرب يمشون أخويه حسين ماردهم
گال أختي لها أولاد نشمي وسبع واحدهم
لچن گلبي عليهم طاح – أنه زينب
روس أولادي فوگ أرماح – انه زينب
فدوه الخالهم يرحون – ليش ألولدي متذكرون
بالمصرع عفت ولدي يم الاكبر وجسام
وروس اعله الرماح أوياي لمن وصلوها الشام
كل ساعه يجوني براس حرگوا گلبي هالظلام
روعوني أمن أصد ليهن وآنه الحايره بأيتام
ياأم المثل حالي – انه زينب
ولدي اتذبحوا أكبالي – أنه زينب
عله أمهم چانوا أيخافون – ليش الولدي متذكرون أنه زينب
خوال الاربعه أويه يحسين أوياهم ضحوا بدمهم
ظلوا بالطفوف أجساد لا أم لا أخت يمهم
ولدي عالترب نومه شحالي ايصير وأنه أمهم
كلهم عالثره مطشرين لا واحد اجه ولمهم
تذبحوا ويه أخويه حسين – أنه زينب
لأمهم روح ورياحين -- آنه زينب
لمن بخوتي أتواسون – ليش الولدي متذكرون
يحاچيني الگلب أسمع يزينب لليسر روحي
ويم حسين والعباس والاكبر بقت روحي
وعله شبل الحسن جسام يبچي الصخر من نوحي
ولدي اثنين وياهم عليهم نزفت اجروحي
ذبايح ولدي بالمصرع – أنه زينب
ما ألگاهم أمن ارجع – أنه زينب
أدري بهظمي مايرضون – ليش الولدي متذكرون