لاتسولف من يمــــــر ذكره عليك
سكتت السبعـين الـــف من شافته
شارت العبــــاس زينب بالطفوف
لهالسبب عبــــــاس تكتل شارته
هوه حيدر لاتطــــــــــالبني بدليل
انظر الهامات تعـــــــرف ضربته
بس فرق حــيدر ابو زينب يكون
واخو زينب ابو فــــــاضل كنيته
وهوه ملك الموت والفارق بسيط
اسأل الاموات كَبلك عــــــــــرفته
طبع عزرائيل .. ساكت من يفوت
وابوفاضل .. كَبله تذبــح صيحته
ها انا العبــــــــــاس لاوين الفرار
الما يلوحه السيف لاحه بخزرته
يقره سيفه الزلزله بهـام الرجال
واليفر منهــــــم يرتل .. هل اتى
خيبر يشوف النهر والجيش باب
وبت محمد للكـــــــــلايف ذخرته
ماقلع للباب مـــــــــن حز الركَاب
اخذ خيبر كلــــــها حطها بجربته
لولا حــــــــــيدر لافتـى بأمر الاله
ماخطت عبـــــــــاس كلمة لافتى
اسد مجروح ونزل برض الطفوف
يالله .. كَلي شلــون بيها الجرحته
ضهضب الليث ورجف كَلب الالوف
يصير وكت الصيف مر بيها الشته
وين راح تلـــــــــــــوذ بيمن تتقيه
وبالعظم لاذ الجــــــــلد من سمعته
ردت احلها الحـيّرت فكـرت الزمان
شلون ماي العــــــــــين نبله بدته
كتبو اعله السهم عطـشان الحسين
لهالسبب عين ابـو فاضــــل روّته
تريد ثلثم جف علـــي وضنك محال
جفوف ابو فاضــــــل محالك حلته
ارسم الجـفين بشفافـــــــك وشوف
ماتقبّل جف عــــلي .. لا .. شفته
من يمـــر ذكر النبي .. نصلي عليه
من يمر ذكره نصـــــــــــلي الخوته
وشنهو معناها .. تصـلّي من جلوس
النهر كَام اعله حـــــــيله بحضرته