وينه الفكدة ولدها وينها
 

تجليبه
لسان حال – ام الأم ألفكدت ولدها---
.....................
تعالي اوياي يالعندچ ولد مفگود
آنه اوياچ خلي بالبواچي انجود
....................
وين الفاگده منها ضناها وراح
وين اللي تشوفه اظلم المصباح
ميفيد ان صفگنه الراح فوگ الراح
وليدچ مايرد ووليدي لينه اردود
...................
اسولفلچ ولد عندي گمر چنه
ذخر للشيب إليه چنت اتمنه
افرح بيه ردت ووليدي يتهنه
راح أمن ايدي ما ادري الولد محسود
...............
بالله سولفيلي يالحزينه اشبيچ
هم راح العزيز ومابعد رد ليچ
هم صوت وسمعتي امودعچ ايناديچ
يُمه والثياب اعليه لبسي سود
....................
هم مثل الولد ابني بعد مارد
ولا واحد يسكن دمعتي محد
عمت عيني اشوفه گمر ومدد
وبحسنه وجماله الدنيه هاي اشهود
..................
حگها الام لونها ونت وناحت
ولطمت عينها وآيبني لو صاحت
رحت وسنين تعبي اوياك هم راحت
يبني والولد لمه ذخر مريود
........................
كون اعمي نظر عيني بعد عينك
واظل ابچي واصيحن يالولد وينك
شنهو الحال بين الوالده وبينك
يبني وكل وكت بالدار ماموجود
...............
يبني اوداعة الله وبعد ماشوفك
وآنه اللي چنت لحظات ماعوفك
صرت جرح بدليلي وبعد شيروفك
والدارك يبعد الدار ليه متعود
.........سيد عدنان الحمامي