.::||[ آخر المشاركات ]||::.
المهدوية في آخر الزمان‏ [ الكاتب : شجون الزهراء - آخر الردود : شجون الزهراء - عدد الردود : 0 - عدد المشاهدات : 33 ]       »     وانفصمتْ والله العروةُ الوُثقى... [ الكاتب : شجون الزهراء - آخر الردود : شجون الزهراء - عدد الردود : 0 - عدد المشاهدات : 43 ]       »     21 رمضان .. ذكرى أليمة استشها... [ الكاتب : شجون الزهراء - آخر الردود : شجون الزهراء - عدد الردود : 0 - عدد المشاهدات : 37 ]       »     نتقال الامام الى روضة الخلد وا... [ الكاتب : شجون الزهراء - آخر الردود : شجون الزهراء - عدد الردود : 0 - عدد المشاهدات : 36 ]       »     مجلس شهادة أمير المؤمنين الإما... [ الكاتب : شجون الزهراء - آخر الردود : شجون الزهراء - عدد الردود : 0 - عدد المشاهدات : 29 ]       »     الامام علي ابو الأيتام [ الكاتب : شجون الزهراء - آخر الردود : شجون الزهراء - عدد الردود : 0 - عدد المشاهدات : 35 ]       »     عقيلة الطالبيين مدرسة لنسائنا ... [ الكاتب : شجون الزهراء - آخر الردود : شجون الزهراء - عدد الردود : 0 - عدد المشاهدات : 32 ]       »     كيف نكون قريبين من الإمام المه... [ الكاتب : شجون الزهراء - آخر الردود : شجون الزهراء - عدد الردود : 0 - عدد المشاهدات : 21 ]       »     الإمام علي قدر هذه الأمة وقدره... [ الكاتب : شجون الزهراء - آخر الردود : شجون الزهراء - عدد الردود : 0 - عدد المشاهدات : 39 ]       »     ما سَرُ تَعلق اليَتامى بالإمام... [ الكاتب : شجون الزهراء - آخر الردود : شجون الزهراء - عدد الردود : 0 - عدد المشاهدات : 34 ]       »    



 
 عدد الضغطات  : 14560
 
 عدد الضغطات  : 5128


الإهداءات



إضافة رد
#1  
قديم 08-27-2019, 05:45 AM
مديــر عام
سيد عدنان الحمامي غير متواجد حالياً
Iraq     Male
لوني المفضل Darkgreen
 رقم العضوية : 1
 تاريخ التسجيل : Apr 2011
 فترة الأقامة : 4745 يوم
 أخر زيارة : اليوم (02:53 AM)
 الإقامة : الكاظمية المقدسة
 المشاركات : 7,694 [ + ]
 التقييم : 10
بيانات اضافيه [ + ]
افتراضي مجموعة قصائد للعباس ع ..



--
--

--

المستهل

-- عباس أخوك حسين -- لدموعه يجري

من طحت صاح بصوت -- أنكسر ظهري

عالچفين -- ياخويه -- هل العين -- ياخويه

--

يعباس الحمل لومال -- غير اهله منو ايشيله

آنه عالعهد من جيت -- ظعني انته تباريله

مهيوبه چنت بحماك -- ماشفت الحزن ليله

ولاترضه الدمع عباس -- من عين أختك اتسيله

لاتضل نايم گوم -- وحده عضيدك

ابعازتك ظل حسين -- خويه ويريدك

گول اشبيك -- ياخويه -- ويناديك -- ياخويه

--

يعباس وأخوك اعزيز -- ونته اتعاضدت وياه

حسين ابحيرته هاليوم -- اشلون اعضيدك وتنساه

انكسر ظهره عليك وطاح -- خويه وشكبر بلواه

وحده ابساعة الشده -- حاير من تجي تلگاه

لحگ لخوك حسين -- لايظل حاير

تدري بيه ياعباس -- هالعدو جاير

هم يرضيك -- ياخويه -- ويناديك -- ياخويه

---

يعباس انته من امشيت -- چان الماي كل همك

خويه وعسكر ابن ازياد -- وذاك الجمع ماهمك

مثل صولة علي الكرار -- وجعفر مثّلت عمك

ادري بيك ابو الغيره -- وراضعتك وفه أمك

بسيفك تطشر الگوم -- خويه وتلمها

عنك تميل الخيل -- شردت زلمها

متجاريك -- ياخويه -- ويناديك -- ياخويه

--

يعباس الحرم وجله -- ومنك تنتظر جيّه

من باب الخيم نظرن -- اعيون وظلت اربيه

وسكنه اباب خيمتها -- وگفت هيه ورقيه

وآنه من اعاينهن -- تشب نار الحزن بيّه

كل ساعه يمي اطفال -- تنشدني عنك

ترويها رادت ماي -- ياخويه منك

وين الگيك -- ياخويه -- ويناديك -- ياخويه

--

يعباس الرباب اتلوج -- عبد الله يريد الماي

لأن جف الصدر منها -- ظلت لافكر لاراي

أسمعها تناغيله -- تگله اشرب دمع عيناي

يبني هاك اخذها الروح -- عساني ودعت دنياي

اعصر اعيوني وشوف -- لادمع بيها

يبني شجنيت اتموت -- ظامي بديها

وتناجيك -- ياخويه -- -- ويناديك -- ياخويه

--

يعباس ابحياة امك -- گوم ورجع اچفوفك

عين اختك يبو فاضل -- متعلمه على شوفك

عفتني ورحت ياعباس -- آنه شلون ماعوفك

اظل اتنطر بكل ليل -- عليّه اتعاود اطيوفك

يبن ابويه بياحال -- بالطف عفتني

من الوطن وياك -- انته الجبتني

مابچيك -- ياخويه -- ويناديك ياخويه

--

سيد عدنان الحمامي
المعارف
10-20-2011, 09:16 PM
عباس عباس -- ارجع خويه عباس -- -- گعده --
بسمه تعالى


سلام عليكم

--

--

--

گعده

--


--


المستهل

--

عباس عباس -- أرجع خويه عباس

ابجمر العطش خلينه -- سالم بس ترد لينه

--

عين من الخيم تربي بيها حرّ العطش أثر

وعين ماتصبر تشاهد صاحب الرايه تاخر

وعين مدمعها ابغزاره وگلب من خوفه تمرمر

ياعين تصبر ياگلب -- وكل العيون اعله الدرب

يالحظه لخيامه يطب -- وتفرح ابجيّته الخدر

بالنار بالنار -- چبود أموجره بالنار

خلها تشتعل بينه -- سالم بس ترد لينه

---

گبل مابالجود يمشي مرّت الحسبات بيّه

أشلون لومايرد تالي للخيم ما اله جيّه

أشلون ظلن بانتظاره سكنه وتحاچي رقيه

وحده أويه وحده اتباصرت -- لو عمي جيته اتاخرت

والخيل لينه لوسرت -- من يرد گوم آل اميه

ردناك ردناك -- عمي هيبه ردناك

لاتهظمها لسكينه -- سالم بس ترد لينه

--

تمر لحظات العصيبه اعيال مايحرسها والي

وآنه ما بالدنيه واحد جسر ويشاهد خيالي

أدري مايرضه أخويه يظل صيوان اخته خالي

لامن اخو لامن ولد -- الزينب يحاميها بعد

عافوها ابطال الشدد -- بالحزن تسهر ليالي

أقدار أقدار -- مارحمتنه الاقدار

أشگد حشمنه ونخينه -- سالم بس ترد لينه

--

رحت من عالتل أشاهد شفت الحسين اعله وضعه

نايم وذباحه يمه رايد الراسه يگطعه

وسلبه أمن اهدومه شفته وگطع من چفه اصبعه


من عيني چن راح النظر -- وجهت صوتي للنهر

متگوم ياخويه الگمر -- چفك الزندك ترجعه

لن صوت لن صوت -- من الشمر لن صوت

أخوچ أگطعنه چفينه -- سالم بس ترد لينه

--

بعد وين انروح والمن ياشباب ابساحة الدم

اهناك جاسم يم الاكبر اهدعش من العمر ماتم

اهناك عبد الله ابوريده نبله من عدها ميسلم

كل جثه مرميه ابكتر -- عالنهر غيبولي البدر

اتعثرت بذيال الصبر -- من عليّه الحزن خيم

ننخاك ننخاك -- يابا الفضل ننخاك

ماتسمع بواچينه -- سالم بس ترد لينه

--

فرّت اطفال او تريدك ياگمر هاشم ابحرگه

بيهم اليوگع ابظيمه وتجي الخياله تسحگه

وبيهم اعله النهر دورغير چفينك ميلگه

للجود رادوه ياگمر -- بيه ماي بلچي أمن النهر

عطاشه وتصد ليك النظر -- وكل طفل عبره تخنگه

اطفال اطفال -- عمي اتصيح الاطفال

غير اچفوف ملگينه -- سالم بس ترد لينه

--

طحنه بيد المارحمنه اعلينه فزعوا فرد فزعه

ابسوط من يضرب امتوني أشهگ او غصبا اجرعه

شافوا الوليان كلها أمذبحه وعالارض صرعه

ياهو اليردلي هيبتي

راحت اوياكم يخوتي

من بعد خدري وعزتي

حرمه وبولية عدوي وبطرف كل عين دمعه

--

سيد عدنان الحمامي
المعارف
10-20-2011, 09:16 PM
يبني يبني -- مني عباس الوصيه --- للعباس ع بسمه تعالى

سلام عليكم

--

-

-

يبني يبني -- مني عباس الوصيه

يبني يبني -- كل اخو احزام لأخيه

ضحي دمك -- جازي امك

--

عباس أمك وصتك -- حفظ الوصيه واجب

ربتك يبني وجاهدت -- وأمك بحقها اتطالب

وانته يبن موت الزلم -- سيفين أبوك الضارب

عينين لحسين اخوتك -- اتصيرون ونته الحاجب

يبني يبني -- اعضيدك بروحك تظمه

يبني يبني -- عالعهد للزهره امه

شده عزمك -- جازي أمك

--

عد عينچ آنه واخوتي -- يم البنين اتشوفين

ابريحانة الهادي الي -- يايمه جاي اتوصين

فدوه العمر شنهو العمر -- سالم يظل بس حسين

مايدنه شر يمه أبد -- واحنه أخوته موجودين

يبني يبني -- ادري اولادي نشامه

يبني بني -- جاهدو دون الامامه

خلي همك -- جازي امك

--

والنعم منك والنعم -- عباس شبل الامجاد

من حيدره عندك عزم -- للشدد عزمك ينراد

الها اليوم امك ربتك -- من هالربه ردت امراد

احزام لأخيّك ياگمر -- عن عيني لو صرتو ابعاد

يبنتي يبني -- للشدد آنه ذخرتك

يبني يبني -- اتخلد الهل الخوّه ردتك

خلي اشمك -- جازي أمك

--

بشري ييمه بالعزم -- يوم الحرب عندي عيد

مثل النجم اهوي اله -- لحسين لو مني ايريد

بركان ازلزها الارض -- لعضيدي لو تنمد ايد

الكل عين اصيرن حيدره -- ايشوفون ابويه امن اجديد

يبني يبني -- والنعم تسلملي عينك

يبني يبني -- ياگمر يزهي جبينك

بعيني رسمك -- جازي امك

--

ودعها عباس ومشه -- بالرادته وفاها

تتعثر الخيل ابزلم -- ابطف كربله خلاها

هيه ولوا ماشافته -- لاچن يگر عيناها

ام البنين الطاهره -- رد الها حق ارباها

يبني بني -- تمتلك ماي الشريعه

يبني يبني -- تروي الحسين ورضيعه

روحي يمك -- جازي امك

--

أم البنين ام الوفه -- اليوم الشدد ظمتهم

ابطف كربله ابدور وزهت -- اشبول اربعه ابهيبتهم

وللزهره وياها عهد -- اولادها نذرتهم

والحيدر اتوافي الوعد -- بس بعد ماشافتهم

يبني يبني -- روحي لهفانه تريدك

يبني يبني -- يالتضحي بدم وريدك

فدوه لسمك -- جازي امك
--------
سيد عدنان الحمامي


س
المعارف
10-20-2011, 09:17 PM
عباس عباس -- زينب نادتك --- -- للعباس ع
بسمه تعالى

سلام عليكم

--

--

--

المستهل

--

عباس عباس -- زينب نادتك

عباس عباس -- هزها رايتك

ترضه يمنعوني -- امن الماي يعيوني

--

اخت حگها اعله الاخو من نادته

نظرت اطفال او حريم ابعازته

زينب الها الساعه هيه رادته

الكل طفل هوه اليبرد مهجته

وياك وياك -- جودك ياگمر

وياك وياك -- أخذه للنهر

وسفه يحرموني -- امن الماي يعيوني

--

گوم ياعباس خويه اشتنتظر

أدري بالشده أبد ماتعتذر

مثل حيدر كون عالشاطي تكر

عالعدو بركان خويه وانفجر

سياف سياف -- ادري بالحرب

سياف سياف -- تجلي للكرب

احتار رادوني -- امن الماي يعيوني

---

انته رفعة راس وكت الموزمه

وآنه بيك أتباها خويه امعلمه

اليوم ياعباس يوم الغانمه

للنهر لزمته گوم المجرمه

للجيش للجيش -- خويه حيّره

ادريك ادريك -- سبع الگنطره

اطفال بچوني -- امن الماي يعيوني

--

نزل سبع الگنطره ابراية بدر

وگامت الفرسان من يمه تفر

مثل غربان وأجه اعليها الصگر

بس هذاك اليشرد ايظل له عمر

شوباش شوباش -- طش روس الزلم

شوباش شوباش -- يحصدها ويلم

عنك يسئلوني -- امن الماي يعيوني

--

ظلت اعله البعد عيني اتناطره

ايعود سالم لاخته سبع الگنطره

اچبود من الظمه اعليه متحيره

ياطفل للظمه ايحمله انصبّره

اطفال اطفال -- ظلت تنتظر

ايجيبلهم الماي -- عباس البدر

ياعمه نادوني -- امن الماي يعيوين

--

ظلت الاطفال تتنطر يعود

وجمر تتلاهب امن اظماها الچبود

مادروا گطعوا اچفوفه امن الزنود

وعالنهر مهشوم راسه بالعمود

من طاح من طاح -- يم المشرعه

چفين چفين -- منه امگطعه

ابعباس فجعوني -- امن الماي يعيوني

--

--

شعجب عباس راح وبعد مايه

صحت ارجع وعوف النهر مايه

لوّن لختك يصح أولاد مايه

يفدوك وترد سالم اليه

--

سيد عدنان الحمامي



(http://www.groupalhamame.t4h.info/vb...=newreply&p=92)
المعارف
10-20-2011, 09:18 PM
يادهر آنه العقيله بت علي والزهره امي -- للعباس ع
بسمه تعالى

سلام عليكم

---

المستهل

--

يادهر -- بالگمر -- صوبتني

من وگع -- عالنهر -- روعتي

عمري سلبته -- صبري هدمته

-----

يادهر آنه العقيله بت علي والزهره امي

ماشفت لحظه بحياتي راحه مافارگني همي

امي عافتني يتيمه وغاب ابويه الچان يمي

والحسن بعيوني شفته بالطشت دم چبده مرمي

شحملت -- واصبرت -- عالمآسي

امن الزغر -- شيبّن -- حتى راسي

بعد الصبرته -- صبري هدمته

-----

كبرت آلام السنين ويكبر بروحي حزنها

وظلت اعيوني ودمعها امن البچي ينزف جفنها

لاچن آمالي بخوتي هانت اعليه محنها

اربعه امن ام البنين وللوفه ربه حظنها

أخوتي -- هيبتي -- اربعتهم

بالشدد -- بالمحن -- جربتهم

هذا الخسرته -- صبري هدمته

----------

أخوه عندي من ابويه اربعه والحره امهم

اثلث كواكب مامثلهم اعليهم امچلچل گمرهم

همه رفعت راس اليه واليهم زينب يهمهم

ماچنت ادري اعاين بالمصارع يجري دمهم

لن تهت -- من شفت -- ضيعوني

حشمت -- واعتبت -- من نسوني

راح الضخرته -- صبري هدمته

------

چانوا اشلون اخوه عندي وياهو مثلي اخوه عدها

وياهو مثل امهم اصيله عالوفه اتربي ولدها

وصته العباس اخويه بيه ويضحي وعدها

وشفرة الصارم يگلها بدم مناحرهم احدها

بالغدر -- تنطبر -- هامته

والسهم -- بالنظر -- رميته

انهض ندهته -- صبري هدمته

--------

انهض لاختك ندهته للحزن والهم عفتني

لاتظل نايم يخويه ابشيمتك ونته الجبتني

گتلي عد عينچ يزينب انته تحميني اوعدتني

وتالي مابين النوايب والمصاعب ضيعتي

هالعمر -- يابدر -- ما اريده

هالدمع -- للگلب -- وشيفيده

گلبي كسرته -- صبري هدمته

-----

گلبي مكسور اشيجبره وهاجت احزاني عليه

من ابو فاضل فگدته بالوسف اصفگ بديه

لاجت الروح اعله فگده الشوفته اعيوني ربيه

اخته ويهمني وجوده واخذته مني المنيه

ودعت -- ضيعت -- عزتي

بالجفن -- موتت -- دمعتي

من مرمي شفته -- صبري هدمته

----

سيد عدنان الحمامي
المعارف
10-20-2011, 09:18 PM
وينك يالكافل ضعني -- مبتور --
بسمه تعالى

سلام عليكم

---

--

المستهل
--

وينك يالكافل ضعني -- ناديت وماتسمعني

----

عباس اختك بالحيره -- مصيبتها ولله اچبيره

ترضاها يابو الغيره -- بين اجناب اتضيعني

-----

عباس اختك مفجوعه -- حملت ياشوفه وروعه

رضّوا لحسين اضلوعه -- ونحره الينزف روعني

-----

عباس وشوف اشبيه -- والاثر شنهو اعليه

آه الطف وشاطيه -- مرّ الظيم ايجرعني

-----
من طاحت خويه الرايه -- مارحمت بيه اعدايه

لوتدري يبن الايه -- عدوانك شتسمعني

---

شتتصور خويه اعيالك -- هم يرحمهم چتالك

سلبها وداس اطفالك -- هذا الشفته ايجزعني

----

عباس الهم اشكبره -- ياشاب اعيوني اتنظره

مذبوح وينزف نحره -- وعبد الله اللي يفجعني

---

عباس او وحشه الليله -- تتراجف خويه العيله

ياويله الحالي ويله --شلون بغفله اتودعني

---

سيد عدنان الحمامي
المعارف
10-20-2011, 09:18 PM
بسمه تعالى

سلام عليكم

--

--

المستهل

----

عباس اشعندك راي -- اطفال ورادت ماي

مو واعدتها -- المن عفتها

-----

عباس اطفالك تلاحگ ليها

لاماي شح الماي خويه اعليها

غيرك كفو ماكو الذي يرويها

ونار ألظمه بچبودها طفيها

شيصّبر هالاطفال -- شلون اتظل بهل الحال

من صبّرتها -- المن عفتها

-----

ياخويه ياگلب الاصّبر بيهم

وبگلوبهم جمر العطش يچويهم

وين الدمع لوظل دمع ارويهم

حتى الدمع شح ياوسافه اعليهم

نشفن دمعات العين -- يردون الماي أمنين

اعيوني اعصرتها -- المن عفتها

------

ياخويه شو حتى الدمع خيبني

او چم طفل عالماي الذي عاتبني

وكلما اعاين هالوضع عذبني

ابها الحال عباس اشگلت جاوبني

من ايدي اخذ الجود -- هاليوم انته الموعود

يالعاهدتها -- ألمن عفتها

-------------

يالبشدد مذخور خويه النه

للنهر روح ابهمتّك وتعنه

او زيح الكتايب يبو فاضل منه

بالماي ترجع كل طفل يتمنه

سيفك هذا ابيمناك -- عالي امن ايرف الواك

روحي خذتها -- المن عفتها

----

عباس من شد العزم يتبختر

صاحت كتايبهم اجانه حيدر

للخيل خلاها ابجثث تتعثر

من سيفه يخلص بس هذاك اللي فرّ

من طب شبل الكرار -- بركان اتفجّر نار

يالزلزلتها -- المن عفتها

----

للنهر طب ابرايته يملي الجود

هذا الذي يوم الشدايد مريود

لأطفال اخوه كل همه بالماي ايعود

تلتهب يدري امن الظمه اهناك اچبود

صابوها ابسهم العين -- گطعوا منه الچفين

ابعيني شفتها -- المن عفتها

----

سيد عدنان الحمامي
المعارف
10-20-2011, 09:19 PM
-- عباس خلينه ابعطش -- خل تلتهب نار الظمه --

بسمه تعالى

سلام عليكم

----

--

المستهل

---

عباس ارجع نادته -- زينب ولزمت رايته

جمر العطش نتحمله -- متريد ماي العايله

----

عباس خلينه ابعطش -- خل تلتهب نار الظمه

اقسم عليك ابوالدي -- اقسم عليك ابفاطمه

تدري علينه لو غبت -- چم گلب راح اتألمه

ظل يبن ابويه للخيم -- سور انته عباس وحمه

يصبر اخوها رادته

ام الخدر من كلمته

ابدمعة العين الهامله -- متريد ماي العايله

-----

ياخويه ماغيرك امل -- النه يسبع الگنطره

هالحرم بيك أمأمنه -- لورحت تبقه امحيره

اوشخصك يخويه الكل چبد -- عباس راح ايصبره

وآنه اظل ابعزتي -- ابهيبه وجلال امخدره

جرد الصارم شافته

للرايه هزها ابيمنته

زينب بقت متوجله -- متريد ماي العايله

------

زينب لخوها شافته -- عباس من شد العزم

سل مرهفه بعينه الزعل -- وتراجفت ذيچ الزلم

شوباش طش روس العده -- بسيفه يطشرها ويلم

زلزال وتفجّر غضب -- ماراد زينب تنهظم

مثل الصميده صولته

ميثني وحده ضربته

للجود راد ايوصله -- متريد ماي العايله

-----

ظلت اعيون امن الخيم -- تربي وتصد صوب النهر

ابروح الصبر تتنطره -- للماي ماحست اثر

اچبود الموجره امن العطش -- بغيابه صارت بالخطر

صاحت يسبع الگنطره -- وينك يبن فارس مضر

اخت ولخوها حشمته

سالم يجيها رادته

زينب العنده امدللة -- متريد ماي العايله

----

امدللته ظلت حايره -- زينب العنده امودعه

ماتدري سبع الگنطره -- راح وبعد شيرجعه

وجهت صوت ام الحزن -- هالصوت هز المشرعه

عباس لختك ماتجي -- ياخويه خدري اتضيعه

ماتدري زينب هامته

مشطوره لمن نادته

وينك يبن عقد الوله -- متريد ماي العايله

----

عالمشرعه طاح الگمر -- طاحت ايساره ويمنته

والعين رماي النبل -- بيها يصوب رميته

من شدة اصواب العمد -- يشطر لخوها هامته

عباس من عنها مشه -- زينب بعد ماشافته

عالنهر صارت نومته

لمن مشه ماودعته

المن بعد متأمله -- متريد ماي العايله

----

سيد عدنان الحمامي
المعارف
10-20-2011, 09:19 PM
مو عباس صاحوا هذا چن حيدر -- للعباس ع
بسمه تعالى

سلام عليكم

----- نزلة عزه --

من نزل صاحوا حيدره -- عباس سبع الگنطره

----

مو عباس صاحوا هذا چن حيدر

خيل وبالزلم خلاها تتعثر

يوم اعليهم السواه چالمحشر

مثل يوم القيامه شافوا المنظر

جيشه اليزيد ايدمره -- عباس سبع الگنطره

-----

مثلك يا اخو جسدها للخوه

يالعندك شهامه وعندك امروه

جازيته لخوك ونخوتك نخوه

والزينب صرت يابا الفضل تچوه

مهيوبه بيك امخدره -- عباس سبع الگنطره

-----

يسبع الگنطره تشهد بطولاتك

مثل حيدر علي متثني ضرباتك

ومثله من تكرّ بالحرب كرّاتك

ظلت كربله تفخر ابصولاتك

چم فارس انته اتحيره -- عباس سبع الگنطره

---------

كل سياف يجفل لمن اتنظره

ابشجاعة حيدره من علمه من صبره

يالراضع وفه والربتك حره

هيه نذرتك عباس للزهره

امك ابيه وطاهره -- عباس سبع الگنطره

------

يا ام المثل امك وفه عدها

كريمه والكرم هوه اليمجدها

شبان اربعه اللي تكرم ابيدها

ومن مثلك يوافي لليواعدها

لأخته يضحي ابمنحره -- عباس سبع الگنطره

-----


--


----- تجليبه ----

---

ياعباس اخوك حسين بالشده

وهاي الگوم خويه اتولته وحده

----

يعباس الاخو للاخو شد احزام

مايرضه الاخو لوله الاخو ينظام

وهذا حسين اخوك ابوليه الظلام

گو الجور عن اعضيدك اترده

-----
مترده يخويه الجور عن حسين

وانته اذراع اله عباس ونته العين

صوبين العده حاطته امن الصوبين

وغيرك لبو اليمه اعضيد ماعنده

----

ماعنده عضيد ايگومله ويفزع

ضربوه بالحجر وبجبهته يوگع

خويه گوم يبن المرتضى الانزع

من مهره گبل مايوگع اتسنده

-------

سنده گوم ياعباس لعضيدك

حسين ابعازتك ياخويه ويريدك

منه تعتذر ونته الحرب عيدك

وسيفك خويه مايوم الغفه ابغمده

----

ابغمده ماغفه سيفك يليث الغاب

يسبع الگنطره والابو داحي الباب

ياعباس بمثلث اخوك انصاب

فوگ العطش خويه ينگطع چبده

------

چبده انصاب اخوك وطاح من مهره

خويه والمثلث طلع من ظهره

مو راح الشمر يصعد على صدره

وحتى الثوب من اعضيدك ايجرده

--------

جردهن اثيابه وسلبه اگبالي

وحز نحره واحس انگطع دلالي

يعباس او لونك شاهدت حالي

عدوك للمخيم من وصل حده

----------

وصل حدنه وخيمنه اعلينه حرگوها

عگب ماجثة المظلوم سحگوها

ومن صدره يخويه اضلوعه فصلوها

والتربات وسفه عفرت خده

----

سيد عدنان الحمامي
عاشقة زينب ع
10-26-2011, 10:40 AM
اللهم صل على محمد وعلى آله الطيبين الطاهرين
طيب الله انفاسكم وادام توفيقكم
سيد عدنان الحمامي
11-11-2011, 09:45 PM
***********
لاتظل نايم عالنهر يمشكر --- مووكت نومه كَوم رد العسكر
**********************

عباس هاي آنه ابخطر تدريني --- جاوينه وعدك من كَلتلي ابعيني
بين العده آنه يبن الأبو اتخليني --- وشلون ترضه شيمتك اتحّير؟

********
عباس وين امجانك الطايح بيه --- دليني وين العلم خويه امخليه
والجود يللي رحت خويه تمليه --- واطفالك اعله الماي هالتتحسر

********
ياخويه موبس العطش لوتدري --- جاروا عليه اعداك سلبوا خدري
بعد ارد اخبرك خويه وسمواظهري--- بالخيزرانه الشمر خويه اتجسّر

********
سمعت الصوت ام الصبر والحزن --- صوب النهر مطروح هيبة عدنان
ابراسه العمود الصابه من العدوان --- واعله الشريعه ابلا جفوف اتكَنطر

*********
والسهم طافي العين من واليها --- من الزنود اجفوفه امكَطعيها
والجود تسجب ماي اظل بيها --- وظلت يتامه اكَلوبها تتفطر

********
شاطت لعدنهر الفرات ابهمها --- لبن الأبو امئيسه من ابن امها
عباس آنه اختك دحن كلمها --- بظيمي يخويه شوفني اتعثر

********
ياحال اخوها لاجفوف اولاعين --- وراسه ابعمود الجاسمينه نصين
لطمت وجهها وحيل خمشت خدين --- من شافت ابن الوالد ابهالمنظر

*********
طاحت على الجفين وتشم بيهن --- واحنت ظهرها والدموع اعليهن
اجفوف الوفه اتكَلبهن اتحاجيهن ---وحسراتها من الصخريتفسر

*******
غسلتهن ابدمع التهله امن العين --- ابجفن التجّرح جفنتها الجفين
لحدتهن ابين الضلوع او بالحين --- مسحت دماهن بالوجه وتعفر



 توقيع : سيد عدنان الحمامي


رد مع اقتباس
قديم 08-28-2019, 03:26 AM   #2
المراقبين


الصورة الرمزية شجون الزهراء
شجون الزهراء غير متواجد حالياً

بيانات اضافيه [ + ]
 رقم العضوية : 465
 تاريخ التسجيل :  Mar 2012
 أخر زيارة : يوم أمس (04:51 AM)
 المشاركات : 5,025 [ + ]
 التقييم :  10
لوني المفضل : Cadetblue
افتراضي



احسنتم وبارك الله بكم

وقضى الله حوائجكم بحق الامام أبا الفضل العباس عليه السلام


 
 توقيع : شجون الزهراء

اِلـهي هَبْ لي كَمالَ الانْقِطاعِ اِلَيْكَ، وَاَنِرْ اَبْصارَ قُلُوبِنا بِضِياءِ نَظَرِها اِلَيْكَ، حَتّى تَخْرِقَ اَبْصارُ الْقُلُوبِ حُجُبَ النُّورِ فَتَصِلَ اِلى مَعْدِنِ الْعَظَمَةِ، وَتَصيرَ اَرْواحُنا مُعَلَّقَةً بِعِزِّ قُدْسِكَ. اِلـهي وَاْجَعَلْني مِمَّنْ نادَيْتَهُ فَاَجابَكَ، وَلاحَظْتَهُ فَصَعِقَ لِجَلالِكَ، فَناجَيْتَهُ سِرّاً وَعَمِلَ لَكَ جَهْراً.


رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

كود [IMG]متاحة
كود HTML معطلة




Loading...


Powered by vBulletin™ Version 3.8.7
Copyright © 2024 vBulletin Solutions, Inc. All rights reserved.
Support : Bwabanoor.Com
HêĽм √ 3.1 BY:
! ωαнαм ! © 2010
سعودي كول