--- كون اصيرن آصف بن برخيا ---

آصف ...

كون أصيرن أصف بن برخيا

.

.

.

كون اصيرن آصف وأعلن نفير

موعرش بلقيس أسوي المايصير

....

كون أصيرن آصف وأعلن حروب

عالذي ضيعوا الناس بهل الدروب

شفت لاسارق ومرتش اليتوب

وناس ظلت حتى ماتملك حصير

........

كون أصيرن آصف بهذا الزمان

الاخرس أعله الحق انطقله اللسان

ليش هاي الناس ظلت لا آمان

والرعيه بعد ما ألها نصير

.....

كون اصيرن آصف وأعمل عجاب

الشمس الغيها وأجيبلهم ضباب

حتى وبحلگ السرق يدوي الذباب

وعالرعيه وحالها الحاكم ضرير

.....

كون اصيرن آصف وكون انتقم

بمعول الحق كل كراسيهم هدم

والذي خان الامانه ينعدم

وراس كلمن ماوفه ويانه يطير

......

كون اصيرن آصف وضد اليجور

ناس متنظفهم امواج البحور

واعدوا ماوفوا اويانه النذور

وكل عراقي صبح مجهول المصير

......

كون اصيرن آصف واحيي السنن

وبجهنم أذب ناس أهل الفتن

عالخصم باعونه وبابخس ثمن

تنعموا بموالنه ولبسوا حرير

.....

كون اصيرن آصف أعليهم مخيف

لان ماظل واحد البيهم شريف

الساقط ايكرموه و ذلوا للعفيف

وعالرصيف تشوف نايم كل فقير

......

كون اصيرن آصف وبيدي الحساب

وأجي الكل خاين اعريله الثياب

عالكراسي طائفي علنوا خطاب

وللخيانه صار واحدهم سفير

........

كون أصيرن آصف أتعده الحدود

واصلب السوو بهل الوادم ركود

على دمنه ساوموا لجل النقود

ومن عقابي مالهم واحد مجير

.....

سيد عدنان الحمامي

..