تربويه في بداية محرم

تربويه اول محرم

..

..

..

عاين بعين البصيره و مخلص أخدم للحسين

جنه لو نار انته بيها هاي وحده أمن الثنين

...

يالذي تخدم بموكب تره الخدمه اموثقه

صوره صوت بكل تصرف شينه يو لاصادقه

أجتهد هاي الخدامه حصلوا بيها الرقه

بخدمة الزهراء خلص يالمحب كل السنين

......

أخذ من عابس وفائه وأخذ من همة برير

وشوف جون شلون ضحه ومسلم وضحه زهير

لبسوا ا چفانه اعله حبه ورفضوا اللبس الحرير

بطل كل واحد تشوفه وعالعهد ثابت يقين

.....

انتم أربات الشعاير قدوه واحدكم يصير

نسمع الهاي المنابر هيه لحسين النصير

أخوه فد احزام نصبح النه ابو اليمه أمير

العزم من جاسم والاكبر بينه أبدن مايلين

.....

نحظر بهاي المجالس اخوه بوشاح الادب

للشعاير من نأدي منها نتعلم وجب

والحضر مجلس حسين وهذا لحسين انتسب

كل منابرنه مدارس ترفض الفعل المشين

.....

ملبسك خيكون راقي وهيبتك لمك وأبوك

وشكلك ايقارن سمعتك عالخُلق من علموك

رادوا اتكون انته شمعه بهل المجالس والسلوك

واليدوام عالمجالس هذا في حصن حصين

......

الوالدينك حق عليك او لاتقل افن لهم

ابد لاتبخل عليهم لاتراويهم هظم

وبجناح الحُب لبوك وامك بعطفك تظم

توفي حق الربه الهم من بعد الله معين

.....

صلة رحمك هذا راده حسين ويأكد عليه

المايجيك انته اعتنيله يبتشر لمن تجيه

بساعة العازه تسنده أيدك أتخلي بديه

أخذ من گلب الحسين الچان عالمذنب حنين

.......

جارك اتحسبه اخوك وتحترم حق الجوار

بغيبته تحفظله أهله بحرمة أهلك هالقرار

حتى ضيگ الخلگ لوصح أله اتقدمله أعتذار

لو تنخّه بيك أنته اتصير اله ذراع اليمين

.....

شكثر خدام الحسين اتخلدت طول الدهر

بالمجالس تركوا النه بالخدامه اجمل صور

خلي احنه هم مثلهم طيب انتركه الأثر

ثابت الساس بخدمته ايصير واحدنه ورصين

...

سيد عدنان الحمامي

--