وفاة الكاظم ع .. كعده .. من السجن ثوره اعتلت ضد السياسه

.......
المستهل
........
من السجن ثوره أعتلت ضد السياسه
حارب عروش الطاغيه وأهل الرياسه
امن الحاله المآساويه ... النه راد الحريه
.......
من قعر ذيچ السجون القاسيه وذيچ السلاسل
وقسوة القيد وجروحه بروحه للامه يناظل
راد للحريه نعرف ودرس للحاكم الجاهل
ماراد سلطه ولاخدم .. ولاراد كرسي ولاحشم
عنده الرعيه اللي اهم ... حاكم الها راد عادل
ميريد حاكم يرتشي لويشرب الدم
بقوت الشعب ويحاسبه اللهم شقدم
أمن اليسرقنه بظهريه ... النه راد الحريه
........
من عزم صبره يريدك صلب وبكل شده صابر
وگال عالتغيير جهدك وعالمخادع انته قادر
والحلف بالله يخدمك بس تربع حيه صاير
لومره حيه لدغتك .. تحترس منها رادتك
خانع لونها شافتك .. تگول هذا حظه عاثر
لاتنخدع مره بعد بالساسه افعات
خل نتعض كافي بعد نحمل اللدغات
أمن الناس العدوانيه ... النه راد الحريه
........
حصدوا وباعوا زرعنه وأحنه حصتنه تعبنه
ناس سراق وتتاجر بالدمه هلكوا شعبنه
أجوا بس للطائفيه الذبح من عنده ارتعبنه
خلقوا لنا أبشع فعل ... بالوطن أخوه نقتتل
وتتگطع أحبال الوصل ... وباالعداوه اصبح وضعنه
رغما على الحرض نظل اخوه بطبعنه
ثديي الوطن هوه الذي حبه رضعنه
ضد الاسود ماضيه ... النه راد الحريه
....
فصم أقيوده بكفاحه وراد هالوادم سويه
مايريد النهب حقك ولايريد الطائفيه
شفنه تالي تقاسموها الك هذا وهذا اليه
واعدك ويخالف وعد ... بس من على الكرسي گعد
وهوه على متونك صعد ... وصار للسارق خويه
وين الخزينه اللي خوت وين الموارد
بقصورهم همه غفوا وأحنه نجاهد
لا للدكتاتوريه ... النه راد الحريه
.........
اليوم محتارين المن ننتخب حيرتنه كُبره
للتُرك واحد موالي وللسعوديه ننظره
واحد لاميركا يرجع ومن قطر يستلم أجره
للغرب واحدهم أبن ... متجنس واللهم يحن
واحنه نظل خرسه اللسن ... للوطن ياهو اليعمره
شد حيلك وتعرف لمن صوتك يناخب
يولا ترد ليك المضت من العواقب
لتأمن بالواويه ... النه راد الحريه
........
اليوم ناخذ درس صبره الكاظم اليحمل اراده
انشوف قيده انشوف حلمه للنصر عالطاغي راده
ابسجن أظلم كظم غيظه وفرش روحه للعباده
رادنه عزّه للنفس ... ونرتفع لعنان الشمس
واليوم نفعه نلتمس ... بحكمه نختار القياده
لجرب المجرب بعد أعرف مصيرك
للاصلح أختار بصدق أنتـه وضميرك
اليصلح نافع تاليه .... النه راد الحريه
....
سيد عدنان الحمامي
...