وفاة الزهراء ع -- دارمي -- للنعش شيله ابليل ياعلي وشيعه

دارمي
----------

للنعش شيله أبليل ياعلي أو شيعه

وعگب الدفن گبري عالخلگ ضيعه

--

الزهره تحس بالموت وصت وصيه

جيب الحسن وحسين والحرّه ليّه

أوياهم أوداعي اليوم گبل المنيه

لو بچوا يابوحسين ماريد أسمعه

--

من ليّه يدنه الموت هاي المسيه

أتغسلني يابو حسين ثوبي عليّه

تتألم أدري بيك لوجرح بيّه

خل الخليله أشلون صعبه يودعه

--

للحسن عينك كون ترعاه والحسين

هُمه المحمد روح تدري ورياحين

أولادي عندي أعزاز ليّه ضوه العين

كل واحد أبيتي يضويلي شمعه

--

ياعلي نادي حسين خليني أشمه

الصدري الذي مكسور خليني أظمه

عالولد حگها أتلوج لفراگه أمه

فراگه گبل ماموت چبدي يگطعه

--

أوليدي تعال اهناه عمري اعله عمرك

أيدي ييمه حسين خلها أعله صدرك

اگعد أريد اشتم يوليدي نحرك

مو أنته من جسمي يالغالي بضعه

--

ليّه الحسن يحسين بلچن ندهته

أمه گبل ماموت كون أحب شفته

وبيدي اريد أمسح موضع چبدته

للسم عگب عيني أوليدي يجرعه

--

زينب اريدين وين تگعد ابسدي

يبنيتي بيدچ ماي بشفافي نگطي

ابحالتچ مدري شلون يايمه بعدي

أبعينچ تظل اتلوج كل وكت دمعه

--

سيد عدنان الحمامي

طيب الله انفاسك سيدنا الجليل
قصيدة رائعة بحق سيدتنا الزهراء ع
رزقنا واياك شفاعتها في الدنيا والاخرة

احسن الله اليكم

وطيب الله ايامكم

اسئل الله ان يرزقنا واياكم شفاعة الزهراء وبنيها ع

اللهم عجل لوليك الفرج يالله

واسئله ان يجعلنا واياكم من انصاره واعوانه

اللَهٌمَ صَل ِعَلى مُحَمْدٍ وَآل ِ مُحَمْدٍ الْطَيّبْينَ الْطَاهِرّيْنَ

>< خادمة الشفيع ><

بارك الله فيك

وجــزيت من رب العالمين


ببركة محمد وال محمد

نسألكم الدعاء