وفاة الكاظم ---- عله الكاظم جرح ينزف -- حزن فگده تعالى

استشهاد المام موسى بن جعفر ع
==================
المستهل ---------
---------
عله الكاظم جرح ينزف حزن فگده تعاله
بعد سجنه وهظم حاله أُمر خصمه اغتياله
نبعث تعازي للنجف -- بالكاظم انعزي علي
------------
عالكاظم بعين الخليقه الدمعه
الموسى بن جعفر هالمسيه اتودعه
فاجعه كبره مامثلها الفجعه
وچبد السماء الهل المصيبه امصدعه
گظه سنين بسجن اظلم سجين ابغربة اوطانه
عباده وبكتاب الله يرتل سورة ايمانه
قيد الحديد امقيده -- الكاظم بسجنه ينولي
-------------------
يابا الحسن هذا الظلم من ازمان
من آل اميه هالقساوه وسفيان
والبني العباس السجون وسجان
سم وقتل حتى البنوه بالحيطان
گبل چبد الحسن بالسم يبو الحمله توذر
وابن جعفر خلص عمره عله المحنه تصّبر
تسمع اصوات البسمله -- بسجنه يرتل تعتلي
----------------
ياعلي من ذاك الوكت لارحمه
صبوا عليكم بالحقد هالنقمه
جازوا اتعابك بالغدر هالامه
حللوا كل واحد البيكم دمه
صدگ كسروا ضلع منها بوجودك فاطمه الزهره
شفت محسن وگع ميت يحيدر ساعة العصره
ونته اصبرت يابا الحسن -- يالبيك كل هم ينجلي
------------------
هالظلم مثله ياعلي لا مامر
مابين تشريد وقتل ياحيدر
طف كربله لساعه ذاك المنظر
چم طفل چم شاب انذبح چم منحر
ابد ولله ابد ماجف دمه نحور الرساله
وابن جعفر دمه قيده يوثق كل نظاله
والخصم لمن حاربه -- هالخصم عقله جاهلي
----------------
من يوم فگد المصطفى والهل اليوم
مظلوم واحدكم يحيدر مظلوم
مابين بالسيف انذبح لو مسموم
والهل الوكت قيد الظلم مامفصوم
يظل قيد السجن شاهد لحد يوم القيامه
عله الغيروا نهج الله وحلاله من حرامه
ياعلي چيف اتنصبت – للمسلمين انته ولي
-----------------
من بعد مابالسجن سمه الظالم
عالجسر نعشه ظل رميه الكاظم
لا آل عدنان الاجوا لا هاشم
غربه التشيعه للغريب الوادم
لون ابنه الرضا يمه يشيعه اويه اليشيعون
وعله فگده تهل عينه دمعها ويه العيون
ودموع عين النايبه – لمصابه من دم اتهلي
-------- سيد عدنان الحمامي ------