استشهاد الامام الكاظم ع -- گعده

..
المستهل
...
موسى الكاظم .. روح أنشد عنه السجان
موسى الكاظم ... كسر قيود الطغيان
ألنه ... رادنه الخير
رافض ... حقنه للغير
.....
الكاظم بصبره يجاهد راد اصلاح المفاسد
راد يگطع دابر الشر والقيم يحييها رايد
وكل حقوق الناس ترجع لجل هذا الحق يجاهد
الهارون صرخه أيسمعه .. الحق الرعيه أترجعه
رادنه خير ومنفعه ... مارضه يبقه محايد
حق الأمه ... لازم يرجع مهما كان
حق الأمه ... عنه ايدافع كل وجدان
طاغي ... يحكم ميصير
رافض ... حقنه للغير
.........
ناس ماخافت رسوله تحكم شلون الرعيه
بني العباس بجرمهم توارثوا جرم آل أميه
وموسى بن جعفر المصلح كافح لأشرف قضيه
الاصلاح لابد ينتصر ... الفاسد يشلعه أمن الجذر
واليوم كلنه ننتظر ... حتى نصبح فد هويه
يلم الوادم ... ويوحدنه أيد بأيد
يلم الوادم ... للتفرقه لا منريد
الوحده ... أجمل تعبير
رافض ... حقنه للغير
.......
من قعر ذيچ السجون القاسيه وذيچ السلاسل
وقسوة القيد وجروحه بروحه للأمه يناظل
راد للحريه نعرف ودرس للحاكم الجاهل
ماراد سلطه ولا خدم ... ولا راد كرسي ولا حشم
عنده الرعيه اللي أهم ... حاكم الها راد عادل
وينه اليعدل .. ميفرق لاهذا وذاك
وينه اليعدل ... نهتف كلنه انصير أوياك
أيجيبه .... اليسرق ويطير
رافض ... حقنه للغير
.....
من عزم صبرك يريدك صلب وبكل شده صابر
وگال للاصلاح جهدك تصلح الاوضاع قادر
والحلف بالله يخدمك بس يفوز يصير تاجر
من هذا مايحصل رجه .. يشوف الوضع ويعالجه
تصير التجاره منهجه ... والبعض بالعيشه حاير
صوت المصلح ... محتاجينه بهذا اليوم
صوت المصلح ... يرد حق الشعب المظلوم
حقنه ... ايطلعه أمن البير
رافض .... حقنه للغير
.........
وينها التيجان چانت بالدرر ومرصعيها
وينها أقصور التشيدت والجواري الكثره بيها
وينها الاموال أمست والترف چان العليها
الاموال راحت مابقت .. وقصورهم كلها هوت
وتيجانهم المن صفت ... كلها راحت من اديها
هاي الدنيه ... عالباغي فد يوم اتدور
هاي الدنيه ... لاكرسي ولاتبقه اقصور
عٍبره ... للطاغي أتصير
رافض ... حقنه للغير
......
هذا موسى الكاظم انظر عامره بكل وكت داره
مايخيب الگصد يمه وأعتنه بحاجته وزاره
والمضيف العامر أبداً ماطفت فد يوم ناره
للمعوز ايكون السند .... للعله يشفيها وبعد
ميفشل اليگصد أبد ... وأبد ميقدم أعذاره
يكرم چفه ... يگضي الحاجه الكل محتاج
يكرم چفه ... وتتعناه الناس افواج
أطلب ... ومنه ومتحير
رافض حقنه للغير
.......
سيد عدنان الحمامي