وفاة الزهراء ع --- كسر الضلع لو بحسين -- يالزهره لو بالجفين

#1 02-10-2013, 06:58 PM

المستهل

--

كسر الضلع لوبحسين -- يالزهره لو بالچفين

ياجرح ل لله تشكين

---

يالزهره لوحان الحشر -- وكل الخلايق تجتمع -- وناديتي احاه يالضلع

ياجرح ل لله شكوته -- ياچبد منچ منگطع -- الياطفل ذبحوه يرتضع

چم نايبه يم الحسن -- هليتي من عدها الدمع -- وبروحچ اتخّلف صدع

ياسهم ياگطعة راس -- وبيدچ اچفوف العباس

الهذا الدليل اتقدمين ...ياجرح ل لله تشكين

---

طالبي ابمحسن طالبي -- والمنذبح ظامي الطفل -- چتاله رماي النبل

قدميهم ابدمهم سووه -- خل تنظر اعيون العدل -- وياخذ قصاصه بهل الفعل

ساعتها شيكون العذر -- چف الغدر لو ينسئل -- اعليمن اطفال وتنچتل

وحگچ يبنت المختار -- من جسروا أباب الدار

للستر بيها أتلوذين ..... ياجرح ل لله تشكين

---

لوشفتي يالزهره النبي -- وشافچ وناده بضعتي -- سولفي ابنيتي سولفي

جازتچ بيمن جازتچ -- يالزهره أخلافي امتي -- حفظولي بيچ أوصيتي

گليله مكسورة ضلع -- جيتك ابضلعي جمرتي -- والحزن بويه ودمعتي

يافاجعه اتهد الحيل -- يللي اندفنتي بالليل

ماينعرف گبرچ وين .... ياجرح ل لله تشكين

---
سولفي للهادي بعد -- گليله حگي منسلب -- يابويه لاسايه وذنب

دار الحزن يشهد الي -- مهظومه ابچي وانتحب -- والدمع جرّحلي الهدب

منعوني حتى امن البچي -- وبصدري نار وتلتهب -- لايهنه زاد ولاشرب

وجروحچ المن كربله -- ورميات نبلة حرمله

للطفل نحره مصوبين .... ياجرح ل لله تشكين

---

خلي الضلع خلي الالم -- ذكري الحسين وذبحته -- وبيدچ امثلث مهجته

وأنسي الكسر يافاطمه -- لوشفتي حامل رايته -- بالعمد هشموا هامته

وسهم الذي طفه النظر -- شلعيها بيدچ نبلته -- خل تبچي عين الشافته

وبروحچ اشچم امصاب -- چم بدر يالزهره غاب

شبان ألچ مذبوحين .... ياجرح ل لله تشكين

---

يالزهره چم شمعه الچ -- چم بدر غيبوا ياگمر -- ذاك الذي فوگ النهر

شبانچ الخلصّوا ذبح -- ابدانهم امست وذر -- واطفال داهمها الخطر

بيهم ابنار ويحترگ -- والبعد من هذا أمّر -- كل ضلع لحسين انكسر

باالصدر ماخلوا ضلع -- من چفه اصبع ينگطع

عالرمح راسه تشوفين ..... ياجرح ل لله تشكين

--

سيد عدنان الحمامي