رمضان - استشهاد الامام علي بن ابي طالب ع

بسمه تعالى
-
-
المستهل
--------
يالودعتنه بهل الفجر -- -يابويه ماينفع صبر
يالچنت خيمتنه وذخر --- بغيابك شيسوه العمر
...............
بروحي يحيدر هالجرح --- ينزف وشيطيبه -- المتصوب بگلبه -- يالفرگتك صعبه
جرحين صار ابمهجتي -- والاه والحسره --- ومخنوگه بالعبره -- يابويه عالزهره
واليوم عني تبتعد -- متشاهدك عيني -- ياخيمة اسنيني -- انسه شينسيني
ياعلي من حزن الحزن --- ودموعي أثرت عالجفن
كل دمعه لمصابك جمر --- بغيابك شيسوه العمر
---
---
يالچفك ايرد الشمس -- دمك بمحرابك -- ينزف من صوابك -- بسيف الذي صابك
مسمومه گالوا شفرته -- ياعلي اليغتالك --- خايف امن اخيالك --- وشلون يدنالك
ساجد وسدد ضربته -- ونته عله السجده --- للخالق اتعبده --- ماواحد الرده
يانبأء عمه وهل اته --- صوبوا الدين بهامته
جازوك يابويه بغدر -- بغيابك شيسوه العمر
--
--
يمنجي نوح امن الغرگ -- وذنون من حوته -- والدين من موته -- وذليت طاغوته
يوسف اللي بيك انتخه -- يسر اله أمره --- الباري كشف ضره --- اليعگوب ويسره
البلقيس من جاب العرش -- حتما لفظ اسمك -- طلسم حرز رسمك -- ومعبودنه يكرمك
كل انبيائه والرسل --- من فضلك اعليهم فضل
بفضلك كتاب الله يقر-- بغيابك شيسوه العمر
--
--
بس الله يعرف والنبي -- قدرك واسرارك -- بقرآنك اخبارك -- وتتخلد آثارك
بيك الشجاعه ياعلي -- يافارس المثلك -- عنده النصر مسلك -- والخاصمك يهلك
تشهدلك أحنين وبدر -- وبسيفك اتكبر -- عالكفر من اتكر -- للمصطفى تنصر
سلطان ساحات الوغه --- بن العاص انفه تمرغه
كل جيل يذكرها وعصر -- بغيابك شيسوه العمر
--
--
طوعت للجن وأنس -- تستسلم الدينك -- ونته بميادينك -- ترجح موازينك
يالبتت بفراش النبي -- وبروحك فديته -- كل عمرك انطيته -- يفتخر خليته
يالوحده چانت ضربتك -- متثني ضرباتك -- وشكثر غزواتك -- كل نصر مافاتك
لساعه خيبر ترتعد -- وحدك الف فارس تعد
ماتعرف الغير النصر -- بغيابك شيسوه العمر
--
--
آنه والحسين وحسن -- ياعلي اتيتمنه -- يادار اليلمنه -- يالرايح لأمنه --
خلي نودعك بالدمع -- نرخصلك الدمعه -- يامصعب الفجعه -- والينه ونودعه
سلمنه عالزهره بعد -- لو نشدت اعلينه -- الشوفتها حنينه -- خلت جرح بينه
يم فاطمه رايح تظل -- نشوفك بعد ماظل امل
ولاطيفك اعلينه يمر -- بغيابك شيسوه العمر
__
--
سيد عدنان الحمامي