بسمه تعالى
--
--
المستهل

لو بالعلم ملفوف جابوني

زفة القاسم يمّه زفوني

ماريد حزن ودمع -- حنه اريد وشمع

زفة القاسم يمه زفوني
----

يمه بالقاسم وعمره محلفچ وشمعة شبابه

حزن ماريدن عليه والعزه نصبي المصابه

واسي زينب بي ييمه ورمله واسيها بمصابه

لوطيفي بعيونچ يمر --- روضي گلبچ عالصبر

يايمه مايسوه العمر --- وگلبچ ايظل بعذابه

نامي قريرة عين مرتاحه --- وبخير يومچ يطر مصباحه

لاينحنيلچ ضلع --- حنه اريد وشمع

--------

يمه لو زفه سمعتي والهلاهل كثره بيها

ذكري عريس الهواشم هلهلي يايمه ليها

هيه رمله هالوحيد عدها راح ومايجيها

عالراح من عدها ظنه --- اسود البسي كل سنه

لوشهر عاشور اعتنه --- ابچي وي رمله البچيها

ماريد لبنچ يمّه تبچيله --- ولادمعچ ايبللها للشيله

ولا گلبچ الينفجع --- حنه اريد وشمع

-----

للوطن دمي ذخرته وللجهاد ابنچ يلبي

يمه انتي روح اليه يمه انتي ضوه الدربي

للفرح فاتحتي رايد يمه جرداغ وانصبي

اتهنيچ نسوان الطرف --- ابنچ يضحي وبشرف

وينولهن اعله الغرف --- هالكرامه بفضل ربي

تابوتي لوشفتي اجه الداري --- ايهلهلن خلي اوياچ اهل جاري

تعرفين ابنچ سبع --- حنه اريد وشمع --

----

بيچ اعرف هالحنان وغالي عندچ ادري يمه

ذكري الحسين ورضيعه المنذبح بالنبل يمه

اتصبري بزينب الشافت كل اخو سابح بدمه

والرايه الها اعله النهر --- من گطعوا اچفوف الگمر

وظهر ابو السجاد انكسر --- وجرح فگده من يألمه

يم نعشي من تحظر هلي وناسي --- قرآن يمه اقري يم راسي

وآنه الچ استمع --- حنه اريد وشمع

...................

اويه الشباب بهل المهمه عدنه افكار العقيده

مو مثل افكار ظلمه احنه علمنه الصميده

بينه كل واحد فدائي للوطن يفدي وريده

من كربله عدنه درس--- منه الشجاعه نلتمس

والنصر واضح كالشمس --- للنصر كلنه نريده

غير الوطن يايمه ماعدنه ---- نضحيله بالدم هوه رايدنه

شرياني خل ينگطع --- حنه اريد وشمع

-------

ياوطن ارض الحسين وبالحسين ايصير نصره

وبيك كل واحد يخونك ابد ولله مانعذره

والذي ساوم عدوك طاح من العين قدره

مانرضه گاعك تنغصب --- طوفان كل احنه نهب

والعدو لابد يرتهب --- راح يحفر بيده گبره

يمه الحسين اتشاهده اعيوني --- والزهره يمه او علي حضروني

خل صدرچ اليتسع --- حنه اريد وشمع

---
سيد عدنان الحمامي