بسمه تعالى

سلام عليكم

--

--

گعده طريقة -- أنه ام البنين ودهري ذبني

--

--



المستهل

--

ياهو الفگدت أوحيد تجيني -- اتشاركني ابدمع عيني أو ونيني

أصفگ راح بالراح -- جاسم من فگدته

--

وين يا أم عدها واحد راح من يمها وفجعها

او نصبت ابداره المناحه وينزف اعله الخد دمعها

خل تجي اتسولفلي همها هم طوت مثلي ضلعها

هم مثلي محنية ضلع -- هم جمر من تبچي الدمع

مو آنه طفولي شمع -- مصيبتي محّد جرعتها

جاسم من أبوه عندي أمانه -- لابي يرحم او بيّه زمانه

تعبي وعمري چن راح -- جاسم من فگته

--

هذا يوم الام تريده بالأبن مهجتها تفرح

تبتهج كل الجوارح بالأماني الفكر يسرح

رمله ما حسّبت لمن فاگده أوحيدها تصبح

مايرحم اصواب الدهر -- ضيّعت اتعاب السهر

ابجسام يفجعها القدر -- والقدر شفراته تذبح

ذباحك عسن گبلك ذبحني -- ولا فرگاك ياجاسم جرحني

لاطّر يوم مصباح -- جاسم من فگدته

--

گبل ميودعني گلي رايد العمي انصره

هوه رباني ابحنانه كون اطش عمري اعله عمره

ولازم أوفيله وأضحي هالنحر من گبل نحره

أفديله روحي ومهجتي -- لو طفوّا حتى شمعتي

ومن دمي تصبح حنتي -- وجسمي سيافه تطبره

ياشمس النصر حني أديه -- عرس الطف كفاح ونصر ليّه

هالنهضه للاصلاح -- جاسم من فگته

--

اهدعش كوكب عدد عمره سنين جاسم هاشميه

اتربه بحظان الامامه النصر يوم الغاضريه

عرسه للثوار فرحه وفوز لنفوس الابيه

جسام قدوه الكل فته -- الاحرار كلها عرفته

ماراد ذله ابدنيته -- راد نصره بهل القضيه

ساحات الشرف والعز تريده -- وبدم النصر حناها ايده

وليل الظلم ينزاح -- جاسم من فگدته

--

هاي فتيان الكرامه الأصبحت للحق طلاسم

حلمه من الحسن عوده وصبر عمه عنده جاسم

والشجاعه حيدريه وبالحرايب وجهه باسم

ابساحة الحريه ظفر -- وبدمه كل طاغي اندحر

جسام خلّد هالاثر -- بأنتصاره الچان حاسم

كل حرّ وشهم هذا اختياره -- لابد يحسم ابدمه انتصاره

وهلال النصر لاح -- جاسم من فگدته

--

هاي هيه الدنيه بيها لوفرح لوحزن قاسي

والذي تفگد ضناها اتبچي لجبال الرواسي

وآنه فگد اوليدي مني شيب اعله اوليدي راسي

ظليت بجروح الحزن-- لا أهدأ ولا أستچن

كون أجرح ابدمعي الجفن -- وياهي لأام جاسم تواسي

واسوني أفگدت زينة الشبان -- واسوني ابدمع عيني والاحزان

شيطيّب هالجراح -- جاسم من فگدته

--

انطفت شمعة بيتي اظلم صار بعيوني نهاري

والعمد طاح أو تهدم بالمصيبه اعليّه داري

بيش أسكن دمع عيني بيش أطفي ابگلبي ناري

راح العزيز او مارجع

من صدري چن گلبي وگع

ونّ البروحي ماهجع

راح من ايد أمه جاسم بعد ماتنفع مناحه

--

سيد عدنان الحمامي