بسمه تعالى

--

في حق رقيه ع
-
-
المستهل
---
يارقيه شلونچ --- ليش حمره اعيونچ

كافي دمعات وبواچي ولاتنوحين

-------

حميده تسولف وتنشد رقيه شبيچ

من صدري وگع گلبي يخيّتي اعليچ

ادري فراگ عمي حسين المأذيچ

حاچيني رقيه الله اليخليچ

گومي خل نتوضه --- نصلي ل لله فرضه

وندعي عاللي حرم عينچ من الحسين

------------------

مثل حالچ رقيه عايني الحالي

مسلم راح ابويه الچان يبرالي

اخذ روحي واخذ احلامي وامالي

غالي كل ابو لبنيّته غالي

آنه ونتي بحيره --- مصيبه عدنه اچبيره

يارقيه الراح ابوها اتجيب ابو منين

-----------------------

اوياچ أبچي حميده وارخص الدمعه

وفراگ الابو ماينحمل طبعه

هم تدرين ابويه ينهشم ضلعه

ومن چفه گطع شفت الشمر صبعه

ياحميده ادريتي --- الشمر جرّ ترچيتي

وآنه اشاگف بالسياط ازغيره الايدين

-----------------

صدگ مسلم ابوچ الغيبوا اهلاله

بالكوفه بحبل ويسحله چتاله

وابويه حسين آنه واگفه اگباله

گطع راسه الشمر وآعله الرمح شاله

النحره صدت عيني --- أ سمع ايحاچيني

ظلي يمي چن يگلي لاتروحين

------------------------

ابويه يارقيه امن انغدر بيها

جثته امن القصر چتاله يرميها

وعمي حسين جثته من اصد ليها

عشر اخيول اشوفن تسحگ اعليها

عمي صحتن وينه --- انتي ويه سكينه

وعمچ العباس منه امگطعه چفين

----------------

اخوتچ كل اخو شفتي گطع نحره

علي الاكبر ذبيح وجاسم بكتره

وعيني للرضيع وعينچ اتنظره

مذبوح ونصيح أحاه يالزهره

بسوط الي ضربوني --- وصحت آه امتوني

والشمر يضربني گلي لاتصيحين

----
سيد عدنان الحمامي --
--