ابوذيات العشرة محرم
...........................
للرضيع عبد الله
...............
يدور الزمن بالاحزان يادار
وصدري شلون يبني الك يادار
يعبد الله شيلمني بعد يادار
واشوف المهد خالي شلون بيه
.........................
المنيه اليوم چنها اعليك ولماي
وألم چبدك احسن بيه ولماي
يعبد الله حليب امنين والماي
من يومين شح يبني عليه
................
طفل يروي اذا عطشان بدار
ولا واحد يجيب الماي بدار
شجاني ومابقيت اوياك بدار
يعبد ألله ولا ينگطع بيه
.........................
يعبد الشمر لمك سبلها
وفگدك مارحم بيها سبلها
ايدك من متت ياهو سبلها
وياهو اللي شلع سهم المنيه
.................
يعبد الله عليك الگلب ماهاد
وليك الموت يبني العطش ماهاد
ذبيح شلون نايم وسط ماهاد
واهزه والدموع التچوي بيه
..........................
ابوذيات في حق العباس ع
..........................
صحت والصوت من صيحي بحيلاي
اريد اشكي والك همي بحيلاي
يعباس أثر افراگك بحيلاي
وجفن عيني عليك ايسيل ميه
............................
انهدم صبري وبعد مايصح منحال
وحبل اليسر للشامات منحال
يعباس وعليك الحال منحال
تبچي لوشفت ظيم العليه
...................
صحت من المظالم حيل خياه
والك صوت الظلامه وصل خياه
يعباس ان گلت عالصبر خياه
اصبري والصبر هم خان بيه
.......................
الجره اعلّيه لوّنه بجبل چاون
ودموعي من تهل جمرات چاون
يعباس اوعدتني الوعد چاون
عفتني للعدو يشتمت بيه
...................... 8
حرم واطفال وسط الحزن هاجيت
وآلام المصايب بيّه هاجيت
عتب عندي يبو فاضل هاجيت
اخبرك ياهظم ياظيم بيه
.............
السان حال زينب ع
............................. 9
عسه مظلم تظل للدوم ينهار
الدمع شيفيد لوله الدمع ينهار
وأنه بوجهي عدوي ابصوت ينهار
شتمني وبالشماته يصد ليه
............................. 10
أسّود امن الضرب متني ويدي
وجرح الفاجعه خزن ويدي
انتخيت ابوالدي بالطف ويدي
يجون الكربله وشافوا شبيه
.....................................11
بچيت اطفال من اتصيح بسماي
يعمه اچبود كلها اتريد بسماي
اجيب الماي لوله الماي بسماي
لچن حرمه وصعب هذا عليه
..........................
فراگ اهلي الاودهم يرعباتي
والي جبريل خادم يرعباتي
چذب من گال واحد يرعباتي
أنه زينب يلوذ الشرف بيه
..................
ردتله اظماد بيش الجرح ينشد
وغده گلبي بونين اعليك ينشد
ردت من الهواشم شخص ينشد
عله ابنات الرساله اللي سبيه
........................... 13
للقاسم بن الحسن ع
................................
ألم مثله فرگتك مالمتني
اشكثر برباك يبني مالمتني
ديار اهلك يجاسم مالمتني
وحشه بغيرك وظلمه عليه
.........................
يعريس الهواشم صدگ ماييت
وعليك ابحور من الدمع ماييت
المنيه ريت يبني الك ماييت
اجتني الي ياريت المنيه
.........................
يرمله شلي لجروحچ ولمي
ألم گلبچ يشاركني ولمي
اعله جاسم خبري عماته ولمي
خواته وللمناحه اعليه سويه
...................
ذخر للشيب كلمن راد يبني
وزماني للحزن والنوح يبني
طفوها الشمعتك جسام يبني
وبعد ماشوف دربي شلون بيه
...................
العدو بچتل الهواشم شرع وآمر
واشد امن المنيه السبي وآمر
اريد المصرع العريس ,امر
بلچي انشوفله امن الشمس فيه
......................
أم وعله وحيّد راح سليت
يجاسم ليش روحي وياك سليت
ابدمع عيناي لمن رحت سليت
وانوح اعليك كل صبح ومسيه
...........................
--- رقيه بنت الحسين ع -----
--------
رقيه شحصلت بس حزن بسهام
خيمنه احترگت وماشوف بسهام
ابويه حسين چبده انصاب بسهام
وراسه اعله الرمح جابوه اليه
..................
رقيه وعليّ سيفه الحزن يرّاد
الابو خيمه البناته دوم يرّاد
يسيره وراس ابويه اوياي يرّاد
ومن شفته بطشت جتني المنيه
.............
رقيه او مابطل وني ونوحاي
ولايعگوب ون مثلي ونوحاي
يعمه اوياي واسيني ونوحاي
اعله ابويه الراح ياعمه امن اديه
..............
رقيه اسمعت حسرة گلب ياريت
ودمعتها بقهر يحسين ياريت
عسى مجلس يزيد انهجم ياريت
ولابيه ماتت ابنيتك رقيه
....................
تم الحزن خويه حسين وشتم
بعد ماقبّلت منحرك وشتم
الشمر يضرب رقيه بسوط وشتم
وهيه اتصيح جيبوا الراس اليه
|