للزهراء ع
.....
المستهل
...
يالخذتي مني الروح ... يافاطمه يمه
آنه وأخوتي أزغار .. نبقه بحزن بالدار
يافاطمه يمه
.....
أمي وألي ردتچ ذخر ... خيمه عليه
نسمه وأشمنچ هوه ... يالعشتي بيّه
أنتي أمان بكل وكت ... وأگعد بفيه
ياوضع حالي بروحتچ ... يمه الزجيه
شلون ألچ لوحنيت
وبحظنچ آنه أربيت
زغيرة گلب وأحتار ... نبقه بحزن بالدار
يافاطمه يمه
....
شلي بحياتي من أظل ... أخذيها مني
آنه يتيمة أم بعد ... من زغر سني
يايمه من غيرج ألي ... يالرحتي عني
بعازتچ ليليه أظل ... بدمعتي أو وني
ياجمرة امصابچ
تچويني بغيابچ
بدمعة جمر من نار ... نبقه بحزن بالدار
يافاطمه يمه
...
جرح المفارگ ينلچم ... من اذكر أسمچ
يظلمني يايمه الوكت ... ونتي يظلمچ
مطمئن گلبي أبشوفتچ ... من چنت يمچ
وياچ ريت بهل اللحد ... يمه اليظمچ
أنتي هوه بريتي
عفتيني ومشيتي
ريت الفلك لادار ... نبقه بحزن بالدار
يافاطمه يمه
.....
يايمه الحسين وحسن ... صدي عليهم
سمعيهم بحرگة گلب ... يمه بچيهم
ترحين عنهم مارضوا ... هُمه أشبديهم
صبروني وآنه بدمعتي ... صبّرت بيهم
من فدوه لعيونچ
أخوتي يردونچ
رحتي شنو خطار ... نبقه بحزن بالدار
يافاطمه يمه
.......
مودعه بالله بروحتچ ... خلينه بالهم
سوده الهدوم وهالحزن ... يالزهره خيّم
مو ماي عيني لو بچت ... أبچيها من دم
أظلم نهاري بفرگتچ ... والدار أظلم
يابهجة أسنيني
خذتي نظر عيني
ياربي ياستار ... نبقه بحزن بالدار
يافاطمه يمه
......
من بعد ظيمچ والقهر ... ياوسفه ياويل
بليل ليش أنشيعچ ... وصيتي بالليل
ياعلي أحفرلي گبر ... والتربته اتهيل
وعينچ عليّه بس تصد ... ودموعها أتسيل
دفنوچ بالظلمه
مظلومه يايمه
والدهر بينه جار ... نبقه بحزن بالدار
يافاطمه يمه
....
سيد عدنان الحمامي