المستهل
.
.عريس . ابني تغّيب نجمه
عريس .. من رحت فدوه لاسمه
عريس .. بعرسه فجعها لامه
.
.
امك آنه بالذخرتك يبني وتعبت بدلالك
وچانت اعيوني اعله طولك تربي متفارگ
خيالك
چالگمر لا آحله منه ماشفت يبني بجمالك
فارگتني بغفله يبني مني يوليدي شبدالك

ماشوف .. فگدك عماها عيوني
ماشوف .. يبني تغير لوني
وليدي . عني اللحد من ظمه
عريس . بعرسه فجعها لامه .
.
ما گلت امي يجاسم سهرت وتعبت ليالي
ما اظن ام مثلي يبني ادلل بهذا دلالي
هاي الك صوره بعيوني لحظه متفارگ خيالي
تدري يوليدي عدوك يبچي هم گام اعله حالي
ماريد .. عمري بعد ماريده
ماريد .. شحال اليموت اوليده
محزون .. بحزنه ودموعه وهمه
عريس... بعرسه فجعها لأمه
..
يازمن تحرمني منه يازمن ويايه قاسي
والذي تفگد ابنها اتبچي لجبال الرواسي
وانه فگد وليدي مني شيب اعله اوليدي راسي
يبني هم تدري معايه بالحزن ويايه ناسي
غالي .. انصب عزه لعيونك
غالي .. ماعيش يبني بدونك
ياريت .. عايش واظلن يمه.
.عريس .. بعرسه فجعها لأمه
......
يبني هاي الدنيه هيه تفارگ الخل وخليله
وفرگتك تدري يروحي صعبه ما احملها ليله
شلون انام اليل بعدك ليلتي بحزني طويله
وعيني ماينشف دمعها يحفر بخدي مسيله
حنيت .. امك تريد اتشوفك
حنيت .. بالدم ييمه اچفوفك
بالعين ... شفته تحنه بدمه...عريس بعرسه فجعها لأمه
.....
تدري يالغالي اشوفن مظلم اعليه نهاري
لمن اشتاگ وأحن لك يبچي حتى اويايه داري
ونكسر گلبه عليه من البواچي يبني جاري
ناري ماتطفه اريدن شوفتك تطفيها ناري
مشتاگ .. گلبي بحنين ولهفه
مشتاگ.. جرحي بعد مايشفه
فدوه .. مني النواظر تعمه.... عريس .. بعرسه فجعها لامه
.......
امك السهرت ليالي وجاهدت يبني بصبرها
رادتك للشيب يبني تصبح لأمك ذخرها
من رحت انته امن اديه ضيعت بعدك عمرها
ظلت بحسره عليك المارحم بيها دهرها
دهري .. بالحزن شيب راسي
دهري ... واسوني اهلي وناسي
والراح ... هوه العمر شيلمه
عربس .. بعرسه فجعها لامه .
.
سيد عدنان الحمامي