وي مصابج يالزجيه..طاح دم الناصريه
طاحت اهواي شباب..الجانت اتقيم المصاب
بالليالي الفاطميه
&&&
طلعت اطالب بحقها ازغار وبعمر الورود
لا اجت من غير ديره ولا تعدت بالحدود
هاي شبان العقيده للوطن سور وجنود
ملت من الصبر هيه ملت بكثر الوعود
رادتك اتكمل النصاب.. الجانت اتقيم المصاب
بالليالي الفاطميه
&&&
مرت اعوام بعمرهم شافو انواع الظلم
شاب وبعمر الترافه جان يحمل هالاسم
طالب ويدرس دروسه اسنين عانه من الهظم
تخرج ورايد وظيفه يصير ويكمل الحلم
يخاطب وماكو جواب.. الجانت اتقيم المصاب
بالليالي الفاطميه
&&&
سال دمه عالرصيف ليش وبلايه سبب
المن النشكي امرنه والمن نوجه العتب
ضاع حقنه من ادينه ومنه الحق انسلب
طلعت ومن دون موعد هاي شبان الشعب
اليوم حل يوم الحساب.. الجانت اتقيم المصاب
بالليالي الفاطميه
&&&
زمره حكمت هالبلاد باعت النفط وهله
حتى مولاي الحسين صاح صوته بكربله
طلعو عالظالم اكسرو اقيود كل اهل البله
ياشباب الثوره قامت من حسين القافله
من البلد زيلو الضباب.. الجانت اتقيم المصاب
بالليالي الفاطميه
&&&
جم شهيد الطاح منهم هاي شبان الوطن
شالت الغيره بكلبها وحاربت اهل الفتن
يخلد التاريخ ذكره الشهيد بهل االزمن
عيونه تبجي وتنادي بصوت مبحوح بشجن
يوزع هناك الشراب.. الجانت اتقيم المصاب
بالليالي الفاطميه
&&&
شاهد الحبوبي يبقى برايته على الظالمين
ويذكر الشبان طاحت والدمه يخضب الجبين
من اجت جانت تزور ودخلت بحصن الحسين
كل اهل ذي قار طلعت من بعدها الاربعين
تريد تحرير الرقاب.. الجانت اتقيم المصاب
بالليالي الفاطميه
&&&
طاحت اولادج بلادي والدمه منهم يسيل
شاب وبعمر الزهور بيده طالع مايعيل
طالب بحقه ويريده نازل باسم الكفيل
ليش ياعالم يكتله الدعي وابن العميل
امك اتواسي الرباب.. الجانت اتقيم المصاب
بالليالي الفاطميه
&&&
خادم اهل البيت
الحاج ابو علي السعيدي