....
المستهل
......
عشت اليالي أبلا ضوه ... بسجنك ولا نسمة هوه
سنين العمر ... خلصت صبر
.....
يحچي ألسان قيده لو يصح عنده
عالكاظم وظيمه وعن هظم چبده
لاجُرم أوذنب لا من شهد ضده
غريب وبالسجن بي طالت المده
كل ظالم أيلعنه الدهر ... لابد أله يوم وعثر
حسره يجر .... خلصت صبر
.......
سجين وچم سنه بي أهله مايدرون
سجن مظلم يحجبه أبلاسبب هارون
وبقيد الحديد أمقيد أ ومرهون
بتراب السجن من يسجد أيشوفون
وبصبره علمنه درس ... للحق نجود بهل النفس
ماكو عذر ... خلصت صبر
.......
يدعي أبكل صلاه للواحد ألقيوم
ياباب الفرج يمته الفرج يايوم
حتى من ضوه الشمعه صفه محروم
ألله بس أله للمنسجن مظلوم
كل طاغي لو رايد تعد ... تلگاه ماحصل لحد
ماله گبر ... خلصت صبر
............
بمحراب السجن يتعبد وخاشع
ليل أنهار صابر محتسب قانع
ومن سجنه الرهيب لأمته ايتابع
لا رايد خلافه بكرسي مو طامع
سفاحه ماعدهم رحم ... عالكرسي باعوها الذمم
تاج وقصر .... خلصت صبر
.........
غدر چف الخيانه چبد ابن جعفر
عگب ما بالسجون بقيده يتمرمر
ونعشه أعله الجسر مطروح ومحير
لا أهله واخوته أتشيعه تحظر
هذا الغريب ومن أله .... مثل الغريب أبكربله
أنرض الصدر ..... خلصت صبر
........
هل دمعك اليله واجذب الحسره
على الكاظم او واسي فاطمه الزهره
عذبوه ابسجن بغداد والبصره
وبالسم ينختم وبلا سبب عمره
ننصب مآتم للحزن ... عالمات مسموم بسجن
غاب البدر ... خلصت صبر
....
سيد عدنان الحمامي