تربويه للخدام
..
..
بنهج ابو السجاد ياصاح التزم
ومنبره ادروس اخذ منه والعزم
......
من منابرنه الشريفه كل درس
والنفع من عدها باليد نلتمس
حسين راد العزّه النه بكل نفس
للسمح راده ورفض كل منتقم
......
هذا منبر للعقيده وللصلاح
دروسه للحب والتآخي والسماح
ويرفض اليتحدث بعنف السلاح
يريدها اتعيش الطوائف بالسلم
....
مايريد الفتنه لو واحد زرع
ويرفض الحبل التواصل من گطع
رادنه نعيش بثقافه ابلا بدع
ولايريد اللي بتحريظه يهم
......
هذا منبر يجمع الكل الفئآت
يبغض الكل تفرقه ونصبح شتات
بالامن كلنه وأمان بهل الحياة
الخير عالوادم سوه اعليهم يعم
....
المنبر بكل حين ونتابع صداه
يكول مو بس صوم هيه وبس صلاه
اتروح للمحتاج وتلبي نداه
فرصه هذي ياسعيد اليغتنم
....
اتساعد المحتاج انشد عاليغيب
وصير اله عون واخو مخلص حبيب
خاف عوزه ايمنعه ويراجع طبيب
ومن علاج الحالته ظل منحرم
.....
هيه مو بس بالعباده الله رضه
حق اكو الجارك عليك وفارضه
واليريد لالله قرض ايقرضه
بوجه كل طالب الحاجه يبتسم
...
الله ميحب العبوس وكل بخيل
راد باخلاقك مع الوادم جميل
لليتيم وارمله بخيرك تعيل
حتى قيد الفقر عدهم ينفصم
....
صير محسن كل وكت الله يريد
لليتامه اتفرح بثوب الجديد
الله هوه يوفقك من تمد ايد
خير رزقك عاليتامه ينقسم
....
يامن اتريد السلامه بهل العمل
لو الك محتاج والبابك وصل
ازرع بروحه بمساعدتك أمل
بعينه تكبر تصبح بفعلك شهم
....
هاي كلها من منابرنه التذيع
بذني اعمالك الك منزل رفيع
بغيرهن ياصاح صدگني تضيع
يروح منك ماجمعته وماتلم
.......
سيد عدنان الحمامي
....
...
...