نزله
يوم 13 محرم
...
...
المستهل
....
وين اليسوي الاحسان ... يدفن عزيز الزهره
......
وين الذي ايريد ألاجر من ألله
وبالمحشر أتصير الشفاعه ظٍّله
يدفن اخويه حسين من يوصلّه
جثته تظل بالميدان ... فوگ الترب ظل نحره
......
أخذوني من يمه أسيره وعفته
والطمت عيني بمصرعه من شفته
حسين العزيز الفاطمه وآنه اخته
بعمري لوّن صح أشريه ... فدوه أروح العمره
.....
هاي اله ثالث يوم اخويه بدمه
لاآنه يمه ولا أجت ليه أمه
أخته اگلهم أرد أظلن يمه
وگلب ألأخت بعد شلون ... ألفگد ألاخوه شيصبره
......
عالرمح راسه أوياي للكوفه يروح
بجسمه شكثر يهل الرحم شفت اجروح
ياروح تحمل هالمصيبه ياروح
عفته ومشيت بهل الحال ... داست الخيل بصدره
.....
جدامي راسه وبي أحس يبرالي
وبلا كفيل أتكول ينظر حالي
وراس أبو فاضل عالرمح وگبالي
كل ساعه ويدير العين ... لخته يصد بنظره
.......
چم راس محمول برمح يمشي اوياي
آنه ورقيه وسكنه مابين اعداي
ألمن اصبر هاي اصبر لو هاي
ياخاطر اللي مكسور ... دمع المصيبه أيجبره
.....
رمله أعله أبنها تنتحب وبلوعه
تسمع گلبها من يون بظلوعه
بثوب العرس كلسا تشم وشموعه
حنه وشم چانت ليه ... أم الشباب أمحظره
....
وأم الطفل درّ الصدر من عدها
عبد الله بي چنها تحس رايدها
تصفگ وجهها من تذكره بيدها
وتگله گلب أمك ليك ... يبني يحن وبحسره
......
كل العيال بهل الضعن مسبيه
وامسح دمعهن لوبچن بيديه
ألهن أصبر لو يصبرن بيه
بينه حزن گد الكون ... ماينوصف وشكبره
...
سيد عدنان الحمامي
|