بسمه تعالى

سلام عليكم

--

--

--

المستهل

--

يحسين الك انصار -- طيبه المراضع

يوم الحرب لوصار -- عالحگ تدافع

الله الذي يختار -- هالصفوه والاخيار

--

يحسين الجهاد ايريد -- ناس الماتهاب الموت

ترفض كل عبوديه -- وترفع عالطغات الصوت

للذل ماتمد يدها -- تسحگ عالمنايا أتفوت

وكل أسم الذي اختاره -- ربك بالعرش منحوت

بيهم يريد الدين -- يعله مقامه

الحكم الطغاة ايدين -- يرفض نظامه

والفازوا بهل الدار -- هالصفوه والاخيار

--

ابساحات الكفاح انشوف -- ما واحد بقه خالد

بس انصارك السبعين -- واحدهم بالف واحد

منهم للشهاده ايريد -- ويحصل المجد رايد

ظلت كربله تفخر -- بيهم والزمن شاهد

السان الزمن كل حين -- يذكر فضلهم

هالفتيه المضحين -- ميصح مثلهم

من يوصف الاحرار -- هالصفوه والاخيار

--

لبّوا للعقيده الصوت -- يالاحرار نادتهم

وبأرض الشهاده اصفوف -- سور اتصير وگفتهم

والرايه حبيب بايد -- هزها وهيه جمعتهم

بيها الشرف والوجدان -- بيها العزّه رايتهم

هالرايه بيد احرار -- اتحير خصمها

همه حماة الدار -- همه قممها

سيوف وعصف من نار -- هالصفوه والاخيار

--

صبوا هالحمم وسيوف -- ظلت عالرگاب اتطوف

وارتعبت بني أميه -- الموت ابهل السيوف اتشوف

ليهم من نزل عابس -- انصابوا بالذعر والخوف

ابصدره يشگف الطعنات -- وارماح العليه وسيوف

خلي الاحرار اتشوف -- هاي البساله

ويه الحسين اصفوف -- ابساحة نظاله

ماقدموا أعذار -- هالصفوه والاخيار

---

هذا اللي يريده حسين -- كون امن الصلابه اصلب

ايريده بالعزم ثابت -- وخصمه منه يتهيب

يصبر لو يحزه السيف -- ايخلي الصبر يتعجب

ويريد ابسمه الامجاد -- يتخلد يظل كوكب

لبوا نداء الله -- لمن دعاهم

نادوا ياحسيناه -- بذلوا دماهم

نالوا رضا الجبار -- هالصفوه والاخيار

---

قدموا دم مناحرهم -- كل قطره صفت ثوره

واخذوا منهم الثوار -- ادروس التضحيه وعبره

واليبذل لجل هالدين -- عند الله عله قدره

ومن ضحه ابو السجاد -- حي مامات ظل ذكره

كربله روح وشوف -- نور الامامه

عالگبر من اتطوف -- اتحس بكرامه

ومن صحبته الانوار -- هالصفوه والاخيار

--

سيد عدنان الحمامي