بسمه تعالى

سلام عليكم

--
--
--

الك حبنه -- وحگ ربنه -- انضحي وسالم انريدك

بعد مصباح -- نصير ارماح -- خلينه تحت ايدك

الك انصار -- حماة الدار

--

احنه انصار العقيده اللي نذر واحدنه دمه

ابمذبح الحريه نفدي هالنحور او مايهمنه

هذا ريحانة محمد هذا ابن الزهره أمنه

كلنه وياه بالمسيره حبه هوه اللي يلمنه

كلنه انسير -- ابدرب الخير -- ويه ابن الچتل مرحب

احنه اجنود -- عنّه انذود -- يمه من گدر يگرب

نذرنه اعمار -- حماة الدار

--

قائد النهظه الشريفه واجب اعلينه نطيعه

نسخي مانبخل نضحي هالعمر لجله نطيعه

نحارب اوياه للظلاله أنأدب انفوس الوضيعه

رادت الدين ابطمعها والمآربها تبيعه

نفدي ارگاب -- ابد منهاب -- نضحي ونرخص الغالي

دم انحور -- اله منذور -- اشما نبذل فلا انبالي

نهج ثوار -- حمات الدار

--

منهج العز والكرامه لاعبوديه او مذله

كلها تنعم بالسعاده ومنهجه للكل تجله

مشكل الامه ابنهضته راد ابو اليمه يحله

بالمساوات او عداله او سيفه عالباطل يسله

لايجامل -- و يناظل -- نهج المرتضى ايعيده

مقام الدين -- يعلي حسين -- الخير لامته ايريده

مع الاخيار -- حماة الدار

--

ثوره وبدم المناحر يسحگ ادروب المنيه

ايضحي بالمال وبنين وروحه من اجل الرعيه

مايساوم مايهادن لابد ايذل آل أميه

نعتلي رادنه عالي اعله من هام الثريه

ابد ولله -- نعوفك لاه -- الك نفدي مناحرنه

كرامه اتريد -- لجلنه اتعيد -- من الذل تحررنه

نظل احرار -- حماة الدار

--

ثوره تتحرر تريدك لاقيود ولا جهاله

تخلص الناس الوطنها اوترفض اشكال العماله

هذا درب حسين واضح ساير ابدرب العداله

والذي ايكرّس جهاده للعدل فاز ابنظاله

يصيح بصوت -- نعم للموت -- ولايرضه ابمذلتهم

يهد اركان -- عله الطغيان -- ويسقط حكومتهم

نور ونار -- حماة الدار

--

ذوله اصحاب العقيده ويه الحسين ابجهاده

جنوده ويّاه بالمهمه يانعم من هالقياده

عابس وهذا زهير ايمرحبون بهل الشهاده

وهذا جون اوياه حبيب اختاروا اليوم السعاده

كلها اوياك -- تتفداك -- رادوا للمجد يومه

عالمجنون -- شيگولون -- خلي الوادم اتلومه

عابس صار -- حماة الدار

--
سيد عدنان الحمامي