بسمه تعالى

-
-
-
المستهل
----
غالي عندي -- وحّيد وماعندي غيرك وين اظمك

غالي عندي -- حگي من افرح بعرسك آنه أمك

هاك اخذ من عمري عمر يبني --- اتعابي برباك شكثر يبني

...........................

أمك آنه يالذخرتك يبني وتعبت بدلالك

وچانت اعيوني اعله طولك تربي متفارگ خيالك

چالگمر لا احله منه ماشفت يبني بجمال

فارگتني بغفله يبني مني يوليدي شبدالك

انته روحي --- ليله وحده ما اعوفك صعبه تدري

انت روحي -- گلبي انته اعيوني انته ونته عمري

انطيني من صبرك صبر يبني --- اتعابي برباك شكثر يبني

..................................... 2

ماگلت امي يجاسم تعبت وسهرت ليالي

ما اظن أم مثلي يبني اتدلل بهذا دلالي

هاي الك صوره بعيوني لحظه متفارگ خيالي

تدري يوحّيد عدوك يبچي هم گام اعله حالي

وين اشوفك --- هم اشوفك بعد يالغالي او تجيني

وين اشوفك --- تعمه بغيابك يجاسم ولله عيني

امحسبه من أكبر ذخر يبني --- اتعابي برباك شكثر يبني

............................ 3

يبني هاي الدنيه هيه اتفارگ الخل وخليله

وفرگتك تدري يجاسم يبني ما احملها ليله

شلون انام اليل بعدك ليلتي بحزني طويله

وعيني ماينشف دمعها يحفر بخدي مسيله

سلوه لمك -- يبني من احزن اشوفك فرحه ليه

سلوه لمك --- يبني وشينفع وسف اصفگ بديه

كون ابچي دمعاتي جمر يبني --- اتعابي برباك شكثر

.............................4

هاي شمعاتك يجاسم روحي هم ذابت معاهن

چن جمر دمعي اهيسه يبني لخدودي چواهن

يبني يالرحت امن اديه جروحي وين الگه دواهن

بتوت البلگلبي مصابك يبني ياجاسم لواهن

فدوه عمري --- هاك اخذ عمري اعله عمرك

فدوه عمري --- تمشي وتخليني انحب شنهو عذرك

كسر الگلب ماينجبر يبني --- اتعابي برباك شكثر يبني

.................................... 5

هاك اخذ ماريد عمري سالم اوليدي اريدك

تعمه عيني ولا اشوفك حنتك من دم وريدك

يبني هذا هم نصيبي امك وماحنّي ايدك

هم صدگ ليّه الزمان الحظني يحبيب يعيدك

جفني دامي --- يالرحت يبني امن اديه وين اشوفك

جفني دامي --- راح اظل يمك يغالي وما اعوفك

خاطرها لمك ينكسر يبني --- اتعابي برباك شكثر يبني

............................6

راح اودعك وامشي عنك يالخذت روحي اشبديه

من عسن ملحوده گبلك يبني واخذتني المنيه

ولا أشوف اعداي بعدك تشتمت يالغالي بيّه

ولا اظل ابلايه والي ولاذخر للشيب اليه

شلي بيها --- روحي بعدك يبني يبني شلي بيها

شلي بيها --- عيني وطيوفك بعد يالغالي ميمرن عليها

شتقدم لامك عذر يبني ---- اتعابي برباك شكثر يبني

--- سيد عدنان الحمامي