المستهل
.....
ناغيته ناغيته ... عبد الله ناغيته
بلچن يفك عينه الولد ... عبد الله ناغيته
....
يومين عبد الله انحرم من الماي ... ولالبن عندي
أمه وعلى حاله انشده مني الراي ... وأصفگ بيدي
كل يوم اناغيله ويناغي وياي ... ويبتسم يبدي
ناديته ناديته .. ماسمع ناديته
لانفس بي ظل بس جسد ... عبد الله ناغيته
....
عبد الله مايحمل زغير گلبه ... ذابت مهجته
لعيوني عينه بس عليه تربه ... أعرف لهجته
وبالخيم لاماي اليصح ويشربه ... يروي چبدته
هزيته هزيته ... بالمهد هزيته
ينازع بروحه بالمهد ... عبد الله ناغيته
.........
يحسين أخذ أبنك أمن ايدي ترويه ... ورده اليه
بس جسد شوفه وروح ماظلت بيه ... آنه أشبديه
لحظه ويموت بحالته أمن أتخليه ... تخطفه المنيه
عافيته عافيته ... مابگت عافيته
أيست من عنده بعد ... عبد الله ناغيته
........
عبد الله ساكت من ظماه أبمهده ... بالحيره أمه
لا لبن ظل ويرتضع من عنده ... او لاعذب يمه
والغصن من يذبل تموت الورده ... وگامت تشمه
شميته شميته .. من نحره شميته
بحظي يموت شهل الوعد ... عبد الله ناغيته
.........
أم لابنها من تشوفه مذبوح ... ساعدها ألله
ياروح هالموقف تحمله ياروح ... أسم ألله تگله
جرحه وجرحها للابد لا ميروح ... والعمر كله
باريته باريته ... وشكثر باريته
يحفظه دعيت الله الصمد ... عبد الله ناغيته
...........
ماصارت او لادارت بهذا الكون ... ما شفنه منها
طفل ورضيع وضامي ليش أيذبحون ... وشنحچي عنها
أم ومرضعه اعله الطفل لاميهون ... من جف لبنها
ودعته ودعته ... لوليدي ودعته
گلبي على أوليدي أنمرد ... عبد الله ناغيته
....
سيد عدنان الحمامي