مهدينه مهدينه -- بدرك يهل اعلينه -- ولادة الحجه عج
بسمه تعالى
ولادة الحجه عج
--
--
--
مهدينه مهدينه --- بدرك يهل اعلينه
مهدينه مهدينه --- وبنورك اتوضينه
***********************
فرحة گلب ملهوف ويرفرف اعليك
ويانه يالمحجوب بالفرحه خليك
صوت الولاء اليوم اسمع يناديك
غير احنه يالغايب ياهوا اليهنيك
مهدينه مهدينه --- فرحه شكبرها بينه
مهدينه مهدينه --- وبنورك اتوضين
****************************
للحب الك أيات رتل گلبنه
بالدم عهدنه اجديد الشخصك كتبنه
بميلادك الشمعات تضوي وطربنه
يعزف وتر الحان نغمات حبنه
مهدينه مهدينه --- وحنة فرح بيدينه
مهدينه مهدينه --- وبنورك اتوضينه
*****************************
السامره جنح الشوگ طار وخذاني
بيدي شمع وبخور وسط الصواني
للحسن عودك هاي احمل تهاني
يالمولدك للخير وكله اماني
مهدينه مهدينه --- لحن الوفه غنينه
مهدينه مهدينه --- وبنورك اتوضينه
*******************************
با الجنه حور العين ابفرحه وسعاده
امن الشمس والاقمار صاغن اگلاده
ورضوان هم مسرور بهاي الولاده
يالذكرك ابكل حال النه عباده
مهدينه مهدينه --- غير الفرح مابينه
مهدينه مهدينه --- وبنورك اتوضينه
******************************
يالمطلعك من نور للحگ تلاله
توجك باري الكون تاج العداله
موعود الك فد يوم تحيي الرساله
وضحها بالقران رب الجلاله
مهدينه مهدينه --- ابميلادك اتهنينه
مهدينه مهدينه --- وبنورك اتوضينه
*************
سيد عدنان الحمامي
|