بسمه تعالى

سلام عليكم

--

--

ننتظر يايوم يالغايب تجينه

رايتك تنشرها وترفرف علينه

---

فرحه ماتنوصف بينه -- مولدك ليله عظيمه

ننتظر طلعة اهلالك -- عطرك انشمه ونسيمه

يا أمل أمة محمد -- رحمة الباري ونعيمه

لابد ابيوم ونسمعك -- ترد صرخات الظليمه

كسر ظلع امك نذكره مانسينه

رايتك تنشرها وترفرف علينه

--

هاي اجمل ليله عدنه -- نحيي هالليله السعيده

وهاي اصوات التندبك -- كلها اصوات العقيده

هيه لا متريد غيرك -- شخصك الغايب تريده

لو تجي اتشاهد فرحنه -- كل محب حناها ايده

فرحه ماتنوصف يالمحجوب بينه

رايتك تنشرها وترفرف علينه

--

هاذه عرس الطف يغايب -- بنصف شعبان العلامه

نفرح ونعلن فرحنه -- نردد انغام السلامه

نقدسه اليفرح اويانه -- واجب اعلينه احترامه

والذي للفرحه يعلن -- عالي عند الله مقامه

يومك ايفرح يبو صالح نبينه

رايتك تنشرها وترفرف علينه

--

طولي ياليلة سعدنه -- اوياج نسهر مانبالي

اخمسطعش شعبان عدنه -- ليله من احلى اليالي

نهتف بحب الولايه -- وصوتنه للفرحه عالي

بحب ابو صالح الليله -- يظل سهران الموالي

بحنة الميلاد ونحني ادينه

رايتك تنشرها وترفرف علينه

--

كل محبينك الليه -- بمولدك حنت اديها

تظل عين اللي تريدك -- عالدرب تنطر تجيها

غير رسمك يبو صالح -- لا أ بد ماتلگه بيها

ويظل كلب المحب يلهج -- اظهر اظهر ياوليها

غير شخصك مانريده ياولينه

رايتك انشرها وترفرف علينه

---

الك يالغايب نظرنه -- شابح الساعة ظهورك

تجي للسهله نريدك -- ايصير بالكوفه حظورك

راية العباس بيدك -- ترفرف امحنيها نورك

تاخذ الثارات بيها -- وتفرح ويكثر سرورك

ويسكن المظلوم اسعتها ونينه

رايتك انشرها وترفرف علينه

--

عالعهد وياك نبقه -- انجدده الليه عهدنه

احنه يالغايب نوافي -- للذي انواعد وعدنه

شيعتك طيبه المراضع -- صافي واحدنه معدنه

نموت مانتخله عنك -- خلي يسمعنه اليضدنه

كل كلب يالمهدي يشتدلك حنينه

رايتك انشرها وترفرف علينه

---
سيد عدنان الحمامي