يجناح الغرام اوياك وديني -- ميلاد الحسين ع
بسمه تعالى
السلام عليكم
====
==
==
يجناح الغرام اوياك وديني
لحسين الحبيب بصحنه خليني
--
يجناح الغرام اوياك اخذ عمري
تدري الفرگته اتهدم ركن صبري
صار اسنين من جافيته خو تدري
وسفه ما ازوره وتخلص اسنيني
--
يجناح الغرام المحب ماينلام
جفنه اعله الحبيب شلون ليله اينام
وآنه دنيتي حرمتني والايام
من عطر الحسين وهذا ياذيني
--
يجناح الغرام الشوگ ماينقاس
وشيبات العشگ عاين غزن للراس
ملهوف الگلب لزيارة العباس
شوگ ايرف اله ولله رمش عيني
--
جفني امن العشگ شوفه تره غافي
وتلهج بالحبيب اسمعهن اشفافي
دافي حب حبيبي المهجتي دافي
حُب حسين لو امرض يشافيني
--
يايوم الازوره وهاي البشاره
حسين ايمرحب ويتلگه زواره
وعباس اليحيي دوم خطاره
وافرح من اخو زينب يحييني
---
سيد عدنان الحمامي
|