المستهل

--

بحب حسين مجنون -- چم عابس وچم جون

يهتف يبو السجاد -- يهتف يبو السجاد

--

چم عابس الك يحسين فرحان -- حاضر هالمسيه

يهتف ياحبيبي بصوت الايمان -- وبروحه السخيه

يتمنه الادين اتصير جنحان -- اتحمله للزجيه

يهنيها بنورك نور الاكوان -- ويهني نبيه

ريحانة محمد -- هذا الكون ردد

يهتف يبو السجاد

--

شفيع المذنب ايبين اهلاله -- والدنيه مزهره

من نور القدس نوره تلاله -- يبهر من تنظره

من جده النبي حسنه وكماله -- بيه فرحت الزهره

جامع من علي حلمه وخصاله -- من حلمه اويه صبره

مكه شعت بنور -- وأسمع منى والطور

يهتف يبو السجاد

--

يامكه ومنى اشتركي بالافراح -- خل يفرح نبينه

وطشي ياسمين او ورد قداح -- عطري للمدينه

وللمروه وصفى هالعطر لو راح -- عطره ايعم علينه

يا اطيب عطر عشاگ فواح -- يتناثر علينه

نتبرك بعطره -- والبارك الزهره

يهتف يبو السجاد

--

يا أجمل واعز واغلى محبوب -- حبك بالظماير

حبك بالدمه ويغذي اللگلوب -- وينقي السراير

وأسمك بالگلب يحسين مكتوب -- وسط الگلب صاير

وبساحل ودادك سيدي انذوب -- يمنور البصاير

حبك هوه قرآن -- وهذا صوت الايمان

يهتف يبو السجاد

---

عذال شكثر لامونه بهواك -- متهمنه الملامه

يالحبك نجاة أمشينه وياك -- بدروب السلامه

درب الخير درب العدل مسعاك -- يانور الامامه

واصبح كل محب يحسين يفداك -- بيك اصبح غرامه

ماكو عالعشگ لوم -- والعاشگ يظل دوم

يهتف يبو السجاد

---
انجددلك عهدنه اليوم يحسين -- ونجدد البيعه

ياشمعة دربنه اتضوي للعين -- حبك مانبيعه

تبقه ارگابنه مطلوبه الك دين -- والشخصك نطيعه

يالدمك يثبت منهج الدين -- ويحيي للشريعه

اعلن لك ولائي -- يحسين وندائي

يهتف يبو السجاد

--

سيد عدنان الحمامي