6 أبريل
--------- قصائد في حق ام البنين ع --- گعده + لطم -----------------------

قصيده --- گعده ----

المستهل

---

يالعندك آلام -- من جور الايام

لأم البنين انخاها -- وكت الشدد تلگاها

ماتظل منظام -- من جور الايام

----

ياهو هم اچبير عنده والوكت دوهن افكاره

وياهو مظنوك ابزمانه وقلل العوز اصطباره

وياهو من المرض يشكي والشفه مل انتظاره

لأم البنين ابلهفته -- من عدها يطلب حاجته

والباري يسمع دعوته -- حاله يتغير مساره

جربها فد يوم -- يالعندك اهموم

وشوف الكرامه العدها -- الله الذي امايدها

اتحققلك احلام -- من جور الايام

----

حّره ياحّره المثلها من نسب طيب اهلها

ومن علي اخذت تجارب والصفات الطيبه كلها

بالكرامه الباري خصها عالي عند الله محلها

بالعطه ماتبخل ابد -- ولاتخلف الواحد وعد

أم البنين ام الشدد -- المشكله هيه التحلها

ماتبخل اتجود -- وّفايه الوعود

بالكرم فايض چفها -- شنگول من نوصفها

واشتملي الاقلام -- من جور الايام

------

بالوفه ماصح مثلها حيرت كل واعي فكره

يُمه چان حسين الها ايصيح من راحت الزهره

اخّوه ربتله نشامه اتريد سالم يظل عمره

ايضحوله رادت بالدمه -- ورادت اتجازي فاطمه

وتوفي حماي الحمه -- وهالوفه منها ينظره

شتجيب اللبطون -- خلهم يشوفون

عباس من اتشوفه -- تدري يضحي اچفوفه

وعالظيم مينام -- من جور الايام

-----

اشبولها امن الاسد حيدر مامثلها يصح لبوه

رضعتهم وفه وغيره ابكل نفس زرعت النخوه

كل اخو احزام لاخيه اتگلهم اوبالشده تچوه

لحسين رادتهم ذخر -- ابساحة جهاده والنصر

اوياهم ترف راية بدر -- اجبال لوشافتها تهوه

ابسوح المنايا -- قدمت ضحايا

ابدور اربعه نذرتهم -- ابحب فاطمه ضحتهم

نصروا للاسلام -- من جور الايام

------

هاي هيه ام البنين اوهاي حكمتها وصبرها

امّكرمه ومهيوبه صارت نعجز انوصف گدرها

ابخدمة الزهره او ولدها جاهدت نذرت عمرها

لحسين لمن ودعته -- قربان قدمتله اخوته

ايعود الها سالم رادته -- وبعد ماشافه نظرها

متلهفه العين -- تبچي على حسين

ظلت عليه بالحسره -- سالم يرد تنتظره

بس ردت ايتام -- من جور الايام

--------

----

--

ابوذيه في حقها ع

---

ثدايه الطيب در الوفه داريت

وعليّ دنياي دورة حزن داريت

انه ام البنين شكثر داريت

وفديت اشبول للزهره الزجيه
--
سيد عدنان الحمامي
========================

====================

المستهل

--

عجيبه شلون ظليتي -- يم عباس ماجيتي

وتظعنين -- ويه حسين

يم عباس ماجيتي

--

يم عباس ظعن حسين -- من ارض المدينه سار

وانتي اتشاهدين بعين -- دمعتها جمر من نار

ليش أوياه ماجيتي -- يالحّره شنو الي صار

ودعتي أخوته أوياه -- وعنچ غابت الاقمار

وصيتي اخوته بيه -- كل واحد عمر ينطيه

هالطيبين -- ويه حسين

يم عباس ماجيتي

--

يا أم البنين أبدور -- لأيام الشدد ذخرچ

مراضعهم وفه وغيره -- يرضعهم أبه صدرچ

وأتعاب اليالي السود -- الويتيها بعزم صبرچ

بيهم عاقده الآمال -- لو يجزي الوكت عمرچ

تعبچ للوفه ردتيه -- والحيدر علي توفيه

تعب اسنين -- ويه حسين

يم عباس ماجيتي

--

حرّه ومايصح حرّه -- مثلچ طيبه وفايه

چانت نصرة المظلوم -- عندچ نصرته الغايه

ومن حيدر علي بيدچ -- سلم للگمر رايه

بيها للنصر ميعاد -- حصنّها علي بآيه

هالرايه حرز بيها -- چف حيدر علي اعليها

تسر العين -- ويه حسين

---

وانتي من هذاك اليوم -- هاي الرايه خذتيها

وصية والده حيدر -- ابها الرايه عگتيها

وأديتي الامانه ابزود -- يم عباس صنتيها

لبو فاضل ابيوم السار -- بظعونه نطيتيها

صعبه من تودعيهم -- أشلون الهم تعيفيهم

وماتمشين -- ويه حسين

يم عباس ماجيتي

---

من أتوادعوا وياچ -- چان الفضل شايتله

عله امتونچ يرفعة راس -- وجمر الدمع هاملته

وصيتي الگمر عباس -- يباري للعقيله اخته

وقبّل ايدچ وعينچ -- وباسة غرتچ شفته

عينچ بعد متشوفه -- اهناك ايطيحن اچفوفه

عليه تبچين -- ويه حسين

يم عباس ماجيتي

---

راحوا كل خوته اوياه -- وروحچ راحت أوياهم

وعينچ عالعزيز حسين -- وهمه اعليچ عيناهم

چم مرّه عثر جدمچ -- من عاينتي ممشاهم

شلون ام البنين اشلون -- گلبچ حمل فرگاهم

عينچ من بچت لحسين -- ليش اوياه ماترحين

شتشوفين -- ويه حسين

يم عباس ماجيتي

--

وداع حسين يم عباس -- ابروحچ وگدّ الجمره

وظليتي ابجفن سهران -- حتى الوسن مامرّه

ماندري صبرتي شلون -- عفيه صبرچ شكبره

روحچ بالامل ظلت -- ايعود الضعن تنتظره

وانتي اربعه امودعه -- أوداع العمرچ ايضيعه

شتصبرين -- ويه حسين

يم عباس ماجيتي

--

سيد عدنان الحمامي
============================

========================================

--

--

يامن ابعسر الزمان اتحيرت -- أطلب أمن أم ابنين أشما ردت

--

يامن اتريد العسر منك يروح -- وبيك هم امن الوكت خلّف جروح

روح لأم عباس انخاها دروح -- ولله ساعتها تفرّح مهجتك

--

يامن اتريد الشفاء أمن العلل -- وأيست من كل طبيب او لا أمل

انخه ام عباس ويروح الوجل -- كل مرض تشفيه وتشفي علّتك

--
يللي مظنوك وحياتك بالعسر -- وسنه اعليك اليوم من همك يمر

اطلب أمن الحره متقدم عذر -- وشوف من همك اذا مانجتّك

--

هاي ام عباس وفاية عهد -- هاي حلالة مشاكل والشدد

هاي حُره وأبد ماتخلف وعد -- لو طحت بالشده تحظر شدتك

--

ياهو عنده اعزيز طالت غيبته -- ويرف گلبه ورمش عينه الشوفته

ينادي يم ام البنين ابدعوته -- تريد جرّب وجه الها دعوتك

--

نادي يم عباس لوحاجه تريد -- اعليها اقسم بابو السجاد الشهيد

وحگ نون وقاف والذكر المجيد -- بيدك اشما ردت منها سلمتك

========================

==================================

--

هاي ام البنين شعندك انخاها

بكل شده وحگ عباس تلگاها

----

هاي ام البنين امجربيها الناس

هاي الحيدر وللزهره رفعت راس

اطلب حاجتك بس گلها يم عباس

بالزهره عليچ وسولف اوياها

----

وياها تسولف حاضره الحره

ولله ام البنين الخاطر اتجبره

عدها جاه عند الخالق اشكبره

دنيه واخره مهيوبه خلاها

-----

مهيوبه وابد مافشلت واحد

شما يطلب طلبته ايحصل وزايد

اطلب يالموالي اطلب شرايد

چم طلبه الگضت بالعين شفناها

---

هاي ام البنين الطلب مترده

انچان ابضيج انته وطايح ابشده

انخاها وحگ اللي حچه بمهده

اجبال ام البنين اتزيل دعواها

-----

هاي ام البنين الدوه الكل علّه

بلسم للجرح كل مشكل اتحله

كلشي ارخيص عدها وطلبتك سهله

وتحب الذي بحسين واساها

---

هاي ام البنين الواست الزهره

لحسين اربعه ضحت فده العمره

اوليدي اتصيحله بس رادت اتنظره

ولمن فگدته دم تهل عيناها

----

سيد عدنان الحمامي
\\\\\\\\\\\\\\\\\\\\\\\\\\\\\\\\\\\\

\\\\\\\\\\\\\\\\\\\\\\\\\\\\\\\\\\\\\\\\\

--

ليش اتنازع ام عباس وحده -- لا وين البنين الاربعه العدها

--

العدها اولاد بالكلفات ماتهتم -- لو جاها الاجل ويلادها تلتم

بس ام البنين اللي بجت من دم -- نادت كل ولدها ومحد ايردها

--

شبان اربعه يامحله لمتهم -- بساعات المنيه حكها رادتهم

اتمنت لو كبل متموت شافتهم -- ملج الموت هاي الليه رايدها

--

عله افراش المنيه اتدير بالعينين -- كل ظنها يجي العباس ويه حسين

هاي ام البنين اولادها الطيبين -- اجروح اهواي بيها ومن يضمدها

--

الله ايعينها تلهج باساميهم -- ظلت عينها بس شابحه اعليهم

وين الينتخي امن اولادها بيهم -- كبل الموت جمرتها يبردها

--

رادتهم يجون وشافوا اشبيها -- واحد من ولدها ايسّبل ايديها

اينكط ماي واحد كون هم ليها -- وسفه ولاحضر واحد يشاهدها

--

غمضت عينها ومحد حضر يمها -- لاعباس اجاها وماتت بهمها

هاي ام البنين اللي يبس دمها -- ابفكد الاربعه وحسين ماردها

--
سيد عدنان الحمامي

\\\\\\\\\\\\\\\\\\\\\\\\\\\\\\\

---

المستهل

---

بس تنخاها -- بس تنخاها -- حُره وماتبخل يمناها

----

انخاها وجرّب فد مرّه

ام عباس الهيبه الحره

گلبك لابد ولله اتسرّه

كرمهّا الباري وعلاها

----

كرمّها الباري وأيدها

شبان اللي كرمت يدها

چم شاره أم عباس العدها

شافتها الناس وشفناها

----

شفنه المعجز منها وأكثر

اطلب منها ماتتعذر

متخليك الحره امحير

مافشلت واحد ناداها

----

ناديها يالطحت ابشده

واليطلب خايب مترده

اقسم بيها باللي اتعبده

لوعّله بجسمك عافاها

----

بالمعبود اتوسل بيها

وللحاجه اطلب من راعيها

اشگد ناس الحره امجربيها

متقصّر من تترجاها

----

اربع شبان الضحتهم

طيبه وللزهره كرمتهم

اينصرون حسين بخوتهم

بس لحسين اتهل عيناها

----

سيد عدنان الحمامي

========================

===========================

--

شريد آنه ابرباكم شنهو منتظره

كحلوا ناظري وجازوها للزهره

--

يولدي الاربعه منكم شريد آنه

تعرفوني ابرباكم ولدي تعبانه

وعيني اشچم سنه اشچم ليل سهرانه

اريد اعيوني منكم للوفه اتنظره

--

اريدن للوفه وادريكم انتوا اسباع

ماضاع التعب بيكم ابد ماضاع

لحسين انتو كل واحد يصير اذراع

وبدم المناحر اشتروا عمره

--
اخوكم غالي عندي ولدي سمعوني

هيبه الكم واليه نور لعيوني

عهد منكم اريد اليوم تنطوني

فدوه انحوركم سالم يظل نحره

--

مدّوله الرگاب اتصير اله معبر

واحدكم مثل حيدر علي لوكرّ

تعرفون امكم اعله افراگه ماتگدر

ولا تگدر تفارگ زينب الكبره

--

انتو الزينب اتصيرون رفعة راس

ابهيبتكم تظل مهيوبه بين الناس

واخوها ان شاء الله ميقصر العباس

واذا قصرّ ابد عن اخته ماعذره

--

روحوا اوداعت الله وكلشي ليهمكم

محروسن والله اللي يسلمكم

وعند ام الحسن بيضّو وجه امكم

والعباس ابشري ايگلها دگ صدره

--
سيد عدنان الحمامي

\\\\\\\\\\\\\\\\\\\\\\\\\\\\\

=\\\\\\\\\\\\\

--

هاي الوفّت ويه الزهره

--

ام عباس الكل يعرفها

تكرم لا مايبخل چفها

نعجز شنريد انوصفها

ام عباس الهيبه الحره

--

للزهره اتوفيها او اكثر

لحسين اتفارگ ماتگدر

لاچن بيها افراگه شأثر

اعليه ظلت بالآه اوحسره

--

اربع اولاد اتقدمهم

لحسين ايضحون ابدمهم

ماقصروا وفوّها لأمهم

كل واحد ضحاله ابعمره

--

امهم من يوم الودعتهم

بحسين وزينب وصتهم

بالطف اينصروه رادتهم

وزينب ليخلوها امحيره

--

العباس اتوصيه بحسينه

باست غرته وباست عينه

ولزمت بيديها الچفينه

اتوصيه گامت بأخته الكبره

--

لختك ياعباس اتلازم

وترد لمّك مفلح غانم

وحسين اعضيدك هم سالم

وبروحك يوليدي اتنصره

--

سيد عدنان الحمامي
\\\\\\\\\\\\\\\\\\\\\\\\\\\\\\\\\\\\

\\\\\\\\\\\\\\\\\\\\\\\\\\\\\\\\

--

آنه ام البنين آنه -- ليش حسين ماجانه

لجله اربعه ضحيت -- سالم يرجع اتمنيت

--

ابعيني گمت اشوف الدنيه مظلّمه

راح حسين چان ايصيحلي يمُه

وين الگاه أقبّل صدره واشتمه

صدگ ذبحوه وطفله منذبح يمه

متشوفه بعد عيني -- عليه مايبطل اونيني

الوجهه شلون لوحنيت -- سالم يرجع اتمنيت

--

من عني مشه ومن يوم ودعني

صحت وياك اخذني او هوه يسمعني

قبّل غرّتي او للدار رجعني

ومابين الحزن والآه ضيعني

بعد مانشفت اعيوني -- بحزني او همي خلوني

ليل انهار آنه ابچيت -- سالم يرجع اتمنيت

--

راحوا كل بنيني وآنه عافوني

شباحه الدربهم ظلت اعيوني

غير اوياهم امشي شلون ودعوني

اظلن سالمه ويلادي يردوني

ليّه همه رفعت راس -- وهيبتهم يظل عباس

هالنشمي عمود البيت -- سالم يرجع اتمنيت

--

اولادي نشامه وأعرف ارباهم

گبل ما للوداع ايحين مسراهم

اجوا باسوا اديه وبست عيناهم

وبزينب وصيتي الماشيه اوياهم

زينب نور لعيوني -- ابوفاكم الها جازوني

الهذا اليوم من ربيت -- سالم يرجع اتمنيت

--

وبحسين شكثر اولادي اوصيكم

اريده سالم ايظل والامل بيكم

وادري ينكسر چفه اليلاويكم

وعين الله يولدي اللي تباريكم

اريد ارويحة الزهره سالم بس يظل عمره

اوياكم بالضعن ياريت -- سالم يرجع اتمنيت

--

صدگ بس اليتامه بالضعن تالي

على نوگ المصايب شاخصه اگبالب

رجف شيريد غير حسين دلالي

عگب حسين ياوالي الألي والي

بعده للعمر ماريد -- وشيفيد البچي شيفيد

اشكثرمن الحزن عانيت -- سالم يرجع اتمنيت

--
سيد عدنان الحمامي
\\\\\\\\\\\\\\\\\\\\\\\\

\\\\\\\\\\\\\\\\\\\\\\\\\\\\\\\\\\\\

المستهل

---

بوصيتي خل اوصيكم -- بحليبي ومرضعي اعليكم

لحسين اربعه نذري -- واضحي الفاطمه ابعمري

----------------

آنه ام البنين الحره تدروني

امكم من نسب طيب تعرفوني

كل واحد ضوه ويضوي لعيوني

اذا درب الشهاده طرّز اجفوني

لبوكم وقعت عهدي -- ابد ما اخلف ابوعدي

عاهدته گبل يدري -- واضحي الفاطمه ابعمري

----------

قرَيت العهد من ادخلت داره

ابمضيف التضحيه مبنيه اسراره

لوّن عرس الشهاده اشّر انذاره

احط ابودري فدوه وبدرب ناره

اريد المجد من بعدي -- واعبّر عن صدق وعدي

ابتعب ايامي وبصبري -- واضحي الفاطمه ابعمري

-----

تدرّعت الصبر لمن كشفلي الحال

ابوكم رادكم اشعاع للاجيال

قبلة شمس راد ومضرب الامثال

تتحقق ابدمكم للوفه الامال

دين الباري يتشيد -- واسمكم علم يتخلد

يفجعني ولوا دهري -- وضحي الفاطمه عمري

-----

عقدت الرايه من حيدر بسم عباس

وهديه انطيته درعه والصبر والبأس

اريدن زينب ابظلك متحني الراس

اذا عن نصرة المظلوم قصرت ناس

تجول ابسيفك وعزمك -- وتگر اعيونها لامك

يراضع بالوفه درّي -- وضحي الفاطمه عمري

-----

لوشفت ابو اليمه ابكربله وحده

واطفاله تريد الماي من عنده

من الخيم چفك للنهر مدّه

واملي الجود يامن للاخو زنده

اريد ابراية الايمان -- يبني تنفجر بركان

وأطّر ابغرتك فجري -- وضحي الفاطمه عمري

------

لگر اعيونچ ابحملاتي وبسيفي

وبيوم الزعل اكرم لعد ضيفي

واجول ابكربله جولاتها ابكيفي

واخذ من صناديد الحرب حيفي

ايشوفوني علي الكرار -- واخلي ابكل وكت تذكار

جسر لحسين امد نحري -- واضحي الفاطمه عمري

-----

سيد عدنان الحمامي

\\\\\\\\\\\\\\\\\\\\\\\\\\\\\\\\\\\

اشلون ام ابنين اشلون ظليتي

ليش الكربله اويه حسين ماجيتي

---

شلون ام البنين ايودعچ ويروح

وعگبه بس جسد ظليتي مابيه روح

حسين اعزيز عندچ ماينفعچ نوح

يم عباس ليه اشكثر دارتي

----

داريتيه وعينچ جانت اتظمه

امن اتشميه ابلهفة فاطمه امه

ايهمچ چان لوهم شفتي اليهمه

وشبول اربعه النصرته ربيتي

------

ربيتي وتعبتي اشكثر ويه حسين

وچان الغطه اجفونچ والفراش العين

شنهو العوگچ وياه ماترحين

وللمظلوم يبني اشكثر ناديتي

------

ناديتي يبني اشكثر يالحره

يُمه ايصيحلچ من راحت الزهره

يم عباس لمن طاح من مهره

راد الماي چان الچبده رويتي

-----

راد الماي حيل امنين ماظل بيه

برماح العده وسيوفها توليه

لعبت خيلهم يم البنين اعليه

چا عن صدره ذيچ الخيل رديتي

----

لعبت خيلهم مارحمته هالناس

بس جثه يظل بالجثه ماضل راس

بهذا الحال صار حسين يم عباس

وحگچ لودمه امن اعيونچ ابچيتي

---
سيد عدنان الحمامي