نعش امي يبويه للصبح خليه
وين ابليل اضلم ياعلي اموديه
=============
نعش امي يبويه خل يضل با الدار
وباجر شيعه وكت الصبح لو صار
بنت انه واخوتي مو بعدنه ازغار
وحيل افراك كلبي ياعلي مابيه
========================
حيل افراك واحنه ازغار مابينه
بس هاليل ويه امنه دخلينه
خيمه الام عكبها من يبارينه
لوشلت النعش بالضلمه وتواريه
======================
لتواريه يبويه رده لمجانه
امنه وخل تضل بس هالمسه اويانه
علي بويه المصاب امنين يلفانه
بعمري لويصح عمر امي ولله اشريه
===================
يبويه والحسن شوفه يهل دمعه
يم امي انينه امن الكلب سمعه
وهذا حسين طاوي امن الحزن ضلعه
عدها اعزيز بلجن تكعد اتحاجيه
=====================
بلجن تكعد وحال اخوتي اتنضره
واحنه اعزاز بويه اعزاز للزهره
عكب امي يبويه الكلب شيصبره
وهذا الدار ماضن بعد ينطب ليه
===================
دار الي خله امن الزهره موحش صار
يبويه والفلك ريت الفلك يندار
باجر لو نشد عن بضعته المختار
شيكول وضلعها للنبي اتراويه
====================
اتراويه للنبي ضلع انكسر منها
وتخبره وكع بالباب محسنها
انشد امتك يالمصطفى عنها
امه الواعدت هالوعد ماتوفيه
====================
ماوفت وعدها امتك مالت
يالهادي اعل دارك صالت وجالت
دمع ودموم من اوديعتك سالت
وحال الزهره حتى للسمه ايبجيه
--------------
سيد عدنان الحمامي