البحر الطويل
--
-
عليل وشفت بعيوني -- لاشافت عساها العين
ابويه اعله الرمح راسه -- وعمي امگطعه الچفين
--
عليل ابلوعتي وهظمي -- ونار النايبه بحشاي
اتوچه اهله حسراتي -- ابهظم الشافته عيناي
ابويه بس نحر شفته -- وراسه للشماته اوياي
وصدره الشمته الزهره
تسحگه الخيل وتكسره
ورضيعه المنگطع نحره
وسدته على صدره -- ومن نحره سمعت اونين
--
سمعت الصوت من نحره -- يگلي ياعلي اوليدي
على صدري الطفل خليه -- وفوگ الطفل حط ايدي
صحت ياهظمة الهظمه -- يونه با لگلب زيدي
ابويه من شلت ايده
اخليها على اوليده
رضيعه السهم بوريده
اصبع شاهدت مگطوع -- من چفه لبويه حسين
--
لوّن مانظرت اعيوني -- ولاصوب الشريعه امشيت
اتعثر ابعلتي اشلون -- ظهري اعله الكفيل احنيت
بس ازنود لاچفين -- وعينه لاشفت ياريت
شوفه بالسهم طافيه
وجوده الماي ماظل بيه
والرايه حزينه اعليه
يم راسه اگعدت وبچيت -- منوانه يعمي وين
--
منوه هالحرم لاوين -- الوحده يم وليها اتنوح
ليله يم علي الاكبر -- تون أگبالها مذبوح
ورمله اشحالها رمله -- بس الجسد لابيه روح
تنعه بالحزن يمه
يعمي اتحنت ابدمه
يعريس الفجع امه
ويبني الماتهنه اتصيح -- من عندي يخطفه البين
--
يبره ياجرح بيّه -- عليل امرمر ابعلتي
مچتوف بحبل مچتوف -- ابرگبتي وچتفوا عمتي
يسير اعله الهزل للشام -- لحظه ماخفت ونتي
روس اعله الرماح اتلوح
اصد ليها ابگلب مجروح
ومن جسمي تريد الروح
اتفيض امن الهظم والظيم -- لا واحد الحالي ايعين
--
والاصعب واشد بالشام -- بينه تشمتوا بينه
طلعت ناسهم چن عيد -- خوارج صاحت اعلينه
زادت حسرتي وناديت -- لوّن جدي حضر لينه
رسول الله ويناشدهم
ياسايه او ذنب عدهم
وآنه المصطفى جدهم
چا ينظر الراس حسين -- بسن ارماحها امعلگين
--
ابسن الرمح راس حسين -- اشوفه امعلگ اگبالي
چنه يصد بعيونه -- عزيز الزهره يبرالي
يدريني عليل ابظيم -- مظيوم وسگم حالي
عليل او مبتلي بعيال
شفت الماتحمله اجبال
ولله امن الهظم تنزال
عمامي واخوتي كلهم -- وابويه وصحبته امذبحين
--
--
ابوذيه
--
-- الارض والسمه امصايبكم بچتلاك
وعليك اعيون خلگ الله بچتلاك
يبو الباقر جنه الظالم بچتلاك
يسمك عكب جور الغاضريه
--
سيد عدنان الحمامي