مواويل لوفاة الامام علي ع
-
الموال الاول
علي بويه عليك الروح لاجت تجذب الحسره
وعكب عينك يداحي الباب هذا الگلب شيصبره
آخر ليله هاي اوياك شخصك بعد منظره
عساهاابهامتي لابيك بويه ريتها الطبره
انظر دمعة اعيوني يبويه من تهل جمره
حزنّنه چان ياكرار حزن ماينوصف كُبره
الخاطر منكسر تدري الخاطر بعد شيجبره
اذا نيتك تودعني واظل املازمه العبره
روح امودع بالله تگله زينب الكبره
---------------------------
الموال الثاني
--
بعدنه ابعازتك لاوين ظل يمنه يحامي الجار
صدگ ودعت دعت دنياتك يريت الفلك هذا اندار
ويه ايتام هاي الناس عگبك ياعلي نحتار
والعنده يتامه اشلون عنهم يرحل امن الدار
لو رايد تودعنه وعدنه اصبحت خطار
ونته ياعلي تعلم بعد الزهره بينه اشصار
من كسروا ضلع منها بصدرها ينبت البسمار
وباب الدار يابو حسين ظلت تلتهب بالنار
وهذا اليوم يوم احزان ماظلت بعد اعذار
بينه اشلون يالوالي اخلافك هالدهر لو جار
يحيدر لاشمل ملتم بعدك هالشمل طشار
--
الموال الثالث
--
يدفان اللحد وسعه ونزله ابهونك ابلحده
لاتلچم جرح راسه ينزف هالجرح بعده
سيف الصوبه مسموم ماصح واحد ايضمده
هذا اللي دحه البيبان وفرق للكفر جنده
طاح ابوسط محرابه ساجد راكع ايعبده
وظلت هاي ايتامه تريد ايتامه من عنده
امعلمهم يباريهم وجاعلهم مثل ولده
مايرضه يتيم ابعوز يبقه ايروح ويفگده
ويجبر خاطر الايتام والمعتاز ميرده
بعد والي اليتامه راح وجمر الحزن شيبرده
--
الموال الرابع
--
تدري ياعلي تدري فگد الزهره مر بينه
عافتنه يبويه ازغار ونته عينك اعلينه
ماترضه لون نبچي ولاواحد يبچينه
فارش روحك النه افراش وبعطفك تغطينه
اسنين اوياك عشنه اسنين بدلال احنه وتبارينه
ومن كل هم يداحي الباب انته اللي تسلينه
ماندري بعد عيناك هالدهر اشيراوينه
واحدنه يتيم ايظل ومن هظمه تهل عينه
عمت عين الوكت بويه حرمنه امن اليدارينه
--
|