انشد عالراية****وجفك عباس
جيتك شجاية****يابو النوماس
منهو يبـــــاريني
بيسري يحاميني
جيتك شجاية****يابو النوماس
**********
ياخويه النوح
ساكن بالروح
كلما اسكت روحي اتخبرة
ارجع وبــجي
وليمن اشجي
وارجع مخنوكة ابهالعبرة
مرهونة ضيـــم
وامواجي اتهيم
فوكَ الشاطي ابكَيد الحسرة
جيتك وهمومــي
متغيرة ارسومي
يالساكن عينـــي
***********
جيتك بهمــوم
ودموع ادموم
جيتك خوية وعيني اربية
جودك جا وين
اووين الجفين
رد الظالم كرب لية
دمعي المسفوح
يلجم الجروح
رحت اوما تسألني اشبية
اخذوني ايسيرة
من الديرة الديرة
عكبك تدريني
***********
جفك ماطــــاح
صار المصباح
تجلت بيه انوار القدرة
مثل الكمرة
فوك الغبرة
لم الكون ابسوح الحضرة
انوار الجف
لاموتوصف
اشلون انوصف عرش ابأسرة
بجفوفك خيرة
ماتعرف حيرة
دمعي ايسليني
***********
وسفة الاحباب
صاروا غيــاب
خويه افراكك هدني ابصعبة
خويه او ظني
تنشد عني
كلفة او تكطع بية ابغربة
يا كافلني
رد رجعني
للموطن ما أندل دربة
تانيتك خوية
ياظنوة بوية
الطيبة توديني
************
جفك ايـــــة
وذيج الراية
بسمك كتبت سورة مجدك
عينك دستور
محور للنور
وعذب الدنيا ايغازل لحدك
وفيت اوياي
ياضي عيناي
ابطيبة كلبك خوية وزودك
ابطاريك افادي
يانبع الوادي
دمعي وحنيني
**************
بقلم الشاعر سراج السلطاني