المستهل

---

أچبود اتذوب -- يالمحجوب -- گلبك ما نفذ صبره

--

أچبود الكم يراعي الثار -- كلها اتوذرت بالسم

مدري الياچبد منهن -- يالمحجوب تتألم

أخر چبد أبوك اليوم -- يبن الحسن يتخذم

ونته بهل المآسي هاي -- يسلطان العصر تعلم

صبرت اشلون -- عليك ايهون -- عفيه وشكبر صبرك

--

يالمحجوب عن العين -- صابر لشوكت صابر

العتره حملت الاوجاع -- تنهض رادتك ثاير

بني أميه وبني العباس -- جاير اقسى من جاير

من غيرك يبو صالح -- بثاره يجبر الخاطر

شبيك اجروح -- اشألك من روح -- يومك تظل تنتظره

---
يومك يمته يالغايب -- كل غايب اله رجعه

غيبه وطالت اعلينه -- وگالوا غيبتك بدعه

ياللثار هذا الصوت -- يمته ابكربله انسمعه

انهض عالظلم ثاير -- والثوب الصبر نزعه

تظل مهموم -- يمته اتگوم -- تاخذ ثار للزهره

--

اجبر خاطر أمك گوم -- يالغايب تريد الثار

مكسورة ضلع وتون -- ونابت بالصدر بسمار

ومحسنها يثار الله -- يتنطّر اباب الدار

وبعينك تشوف الباب -- لساه تلتهب بالنار

شوف النار -- اباب الدار -- يالمحجوب متوجره

---

مايطفه لهيب الباب -- يالغايب لمن تظهر

ولاينشف دمع زينب -- خيمها تظل تتوجر

ولايوگف نزيف حسين -- يبقه ينزف المنحر

وعبد الله الرضيع ايظل -- النبله ابنحره يتنطر

تجي اتحاچيه -- تشوفه اشبيه -- او شلعه السهم من نحره

----

يالغايب مصاب اليوم -- أويانه بهل الحزن خليك

ابفگد العسكري الليله -- غير احنه منو ايواسيك

مآتم للحزن عدنه -- وبينه هم مثل مابيك

من سامره هذا الصوت -- صوت الفاجعه ايناديك

الحسن عودك -- بوجودك -- انته اتنزله ابگبره

--

سيد عدنان الحمامي